Atyraýda «Tablıǵı jamaǵat» uıymynyń ıdeıasyn nasıhattaǵandar anyqtaldy

ATYRAÝ. KAZINFORM – Óńirde «Tablıǵı jamaǵat» (Qazaqstanda tyıym salynǵan uıym) dinı-ekstremıstik uıymynyń ıdeıasyn nasıhattaýshylar áli de bar. Bul týraly Kazinform agenttigine oblystyq polıtsııa departamentinen habarlady.

Vedomstvo málimetinshe, Ekstremızmge qarsy is-qımyl basqarmasy júrgizgen keshendi jedel-izdestirý sharalary nátıjesinde sońǵy eki jylda «Tablıǵı jamaǵat» uıymynyń ıdeıasyn nasıhattady degen kúdikpen eki adam ustalǵan.

– Bir tulǵaǵa qatysty QR Qylmystyq kodeksiniń 405-babynyń 2-bóligi boıynsha sot úkimi shyǵyp, ol 2 jyl merzimge mıssıonerlik sıpattaǵy dinı qyzmetpen aınalysý quqyǵynan aıyrylyp, 1 jylǵa bas bostandyǵyn shekteý jazasyna tartyldy. Ekinshi kúdiktige qatysty tergeý aıaqtalyp, is sotqa joldandy, – delingen habarlamada.

Sonymen qatar 5 azamattyń turǵylyqty mekenjaılarynda tintý jumystary júrgizilip, Qazaqstan aýmaǵynda taratýǵa, saqtaýǵa jáne basyp shyǵarýǵa tyıym salynǵan 130 dana dinı ádebıet pen kasseta tárkilenip, saraptamaǵa jiberildi. Atalǵan tulǵalar QR Ákimshilik quqyq buzýshylyq týraly kodeksiniń 453-babynyń 1-bóligimen jaýapkershilikke tartylmaq.

– Jyl basynan beri «Tablıǵı jamaǵat» jáne «Iaqyn Inkar» (ekeýine de Qazaqstanda tyıym salynǵan) radıkaldy-ekstremıstik uıymdarynyń jaqtaýshylarymen «Shapaǵat» destrýktıvti dinı aǵymdardan japa shekkenderge kómek kórsetý qoǵamdyq qorynyń teolog mamandary birlesip, profılaktıkalyq áńgimelesýler turaqty túrde júrgizilip keledi, – dedi vedomstvodan.

Buǵan deıin Jetisý oblysynda jasóspirimder jasyryn dinı sabaqtarǵa tartylǵanyn jazǵanbyz.