Atyraýda tabıǵatty lastaıtyn kásiporyndar elektrondy túrde baqylanady
Atyraýda qorshaǵan ortany lastaıtyn kásiporyndardy elektrondy túrde baqylaý josparlanyp otyr. Osyǵan baılanysty monıtorıng júrgizetin arnaıy avtomattandyrylǵan júıe iske qosylady, dep habarlaıdy Kazinform.
Atyraýda «Klımattyq dıalog: ózara árekettestiktiń turaqty strategııalary» taqyrybymen halyqaralyq forým ótti. Forýmǵa BUU Jahandyq kommýnıkatsııalar departamentiniń ókili Vlastımıl Samek, Atyraý oblysy ákiminiń orynbasary Jasulan Bısembıev, iri munaı kompanııalarynyń ókilderi men sarapshy mamandar qatysty.
«Álem elderin tolǵandyryp otyrǵan máseleniń biri – klımattyń ózgerýi. Jahandyq jylynýdyń túrli sebebi bolýy múmkin. Máselen, Atyraý oblysynda munaı-gaz salasy qarqyndy damyp, óndiris oryndary kóbeıdi. Soǵan baılanysty qorshaǵan ortaǵa túsetin salmaq arta tústi. Atyraý – tabıǵaty qatal, shóleıtti aımaqtar qataryndaǵy óńir. Bul atmosferalyq aýa sapasynyń nasharlaýyna, sý aıdyndarynyń taıazdaýyna áser etedi», - dedi Jasulan Bısembıev.
Onyń pikirinshe, aımaqtyń ekojúıesin jaqsartý maqsatynda birqatar is-shara qolǵa alynǵan. Klımattyń ózgerý áserin taldaý jáne turaqty strategııalardy qurý joldaryn tabý. Sondaı-aq turaqty damýdaǵy ýnıversıtetterdiń rólin arttyryp, qorshaǵan ortany qorǵaýdy nasıhattaý jáne turaqty tehnologııalardy damytýda bilim berý mekemelerine qoldaý kórsetý. Sonymen qatar klımattyq ınnovatsııalar boıynsha kómirtegi izin azaıtýǵa kómektesetin ozyq tehnologııalar men ınnovatsııalyq sheshimderdi engizý.
«Prezıdent kómirtegi beıtaraptylyǵyna qol jetkizý úshin 2030 jylǵa qaraı parnıttik gazdardyń shyǵaryndysyn 15 paıyzǵa azaıtý jóninde tıisti tapsyrma berdi. Osyǵan oraı ekologııalyq ahýaldy jaqsartý úshin tabıǵı resýrstardy tıimdi paıdalaný máselesine túbegeıli betburys jasaýdy kózdedik. Biz I sanatty iri kásiporyndarmen birlesip, shyǵyndylardy túbegeıli azaıtý jóninde arnaıy jospar qabyldadyq. Aldaǵy jyly arnaıy avtomattandyrylǵan monıtorıng júıesi iske qosylady. Monıtorıng arqyly kásiporyndardyń qorshaǵan ortaǵa qandaı shyǵaryndy jiberetinin elektrondy túrde baqylaı alamyz. Biz solaı jedel basqarý túrine kóshemiz», - dedi Jasulan Bısembıev.
Eske sala ketelik, budan buryn Atyraýda zań buzǵan eki kásiporyn 735 mln teńge aıyppul tólegenin habarlaǵan bolatynbyz.
