Atyraýda suıytylǵan munaı gazyn saqtaıtyn kompanııa negizsiz kiris tapqan
ATYRAÝ. KAZINFORM — Atyraýda «Suıytylǵan munaı gazyn saqtaý parki» JShS tarıftik smetany oryndaýda buzýshylyqqa jol bergen. Sóıtip, negizsiz kiris tapqany anyqtaldy.
Tabıǵı monopolııalardy retteý komıteti Atyraý oblysy boıynsha departamentiniń málimetinshe, kompanııanyń 2023 jylǵa bekitilgen tarıftik smetalardyń oryndalýy týraly esebine taldaý júrgizilgen.
— Taldaý qorytyndylary boıynsha «Suıytylǵan munaı gazyn saqtaý parki» JShS-men ýákiletti organnyń vedomstvosy tarıftik smetada bekitilgen tarıftik smeta shyǵyndary baptarynyń bekitilgen tarıftik smetada kózdelgen mólsherdiń 5% astamyn oryndamaýy anyqtaldy. QR Tabıǵı monopolııalar týraly Zańynyń 26-babynyń 2-tarmaǵynyń 15) tarmaqshasyna sáıkes tabıǵı monopolııa sýbektisi bekitilgen tarıftik smetany oryndaýǵa mindetti bolatyn. Alaıda bul talap buzylyp, «Suıytylǵan munaı gazyn saqtaý parki» JShS-nyń rettelip kórsetiletin qyzmeti boıynsha bekitilgen tarıftik smeta shyǵyndary baptarynyń bekitilgen tarıftik smetada kózdelgen mólsherdiń 5 paıyzynan astamyn oryndamaýy negizsiz alynǵan kiristiń jalpy somasy 189,91 myń teńgeni qurady. Qazaqstan Respýblıkasy Ulttyq Bankiniń bazalyq mólsherlemesi eskerilip, jalpy somasy 218,88 myń teńge anyqtaldy, — dep habarlady departamentten.
Osyǵan baılanysty jergilikti departamenti 2025 jyldyń 1 sáýiri men 2026 jyldyń 31 naýryzy aralyǵynda tarıfti tómendetti. Osy kezeńge ýaqytsha tarıf bekitildi.
— «Suıytylǵan munaı gazyn saqtaý parki» JShS-niń básekeles kirme joly bolmaǵan jaǵdaıda jyljymaly quram ótýi úshin kirme joldy berý qyzmetine ýaqytsha ótemdik tarıfi qosymsha qun salyǵynsyz 7,79 teńge kóleminde bekitildi. Burynǵy qoldanystaǵy tarıf 16,9 teńge edi. Osylaısha tarıf 53,91 paıyzǵa tómendetildi. Kompanııaǵa QR Ákimshilik quqyq buzýshylyq týraly kodeksiniń 164-babynyń 4-bóligi boıynsha 1 mln 258 myń 240 teńge aıyppul saltyndy. Sýbekt ákimshilik is boıynsha salynǵan aıyppuldy 7 kún ishinde 50% mólsherinde tóledi, — dep málim etti departamentten.
Eske sala keteıik, buǵan deıin Atyraýda kompanııalarǵa salynǵan 42 mlrd teńge aıyppuldyń 26 mlrd teńgesi óndirilgenin jazǵan edik.