Atyraýda sýıtsıd jasamaq bolǵan 19 jastaǵy jigit qutqaryldy

ATYRAÝ. KAZINFORM — Atyraýda jas jigit kópqabatty úıdiń shatyryna shyǵyp, sýıtsıd jasaýǵa oqtalǵan. Polıtsııa qyzmetkerleri ony qutqaryp qaldy.

Atyraý oblystyq polıtsııa departamenti baspasóz qyzmetiniń málimetinshe, oqıǵa búgin, 1 aqpanda bolǵan. 

— Kúndizgi saǵat 10:06 shamasynda 102 arnasyna Atyraý qalasynyń turǵynynan inisiniń ózine qol jumsaýǵa bekingeni týraly habar tústi. Jas jigit sýıtsıd jasaý úshin «Almagúl» shaǵyn aýdanyndaǵy kópqabatty úıdiń shatyryna shyqqan. Oqıǵa ornyna patrýldik polıtsııa batalonynyń qyzmetkerleri, polıtsııa aǵa leıtenanttary Serik Joldyǵalıuly men Nursultan Jaqsybaev, ýchaskelik polıtsııa ınspektorlary, polıtsııa kapıtany Erbolat Sapashev pen polıtsııa leıtenanty Baǵytjan Sabyrǵalıev jedel jetti. Polıtsııa qyzmetkerleri shuǵyl áreket etip, óz-ózine qol jumsamaq bolǵan 19 jastaǵy jigitti shatyrdan qaýipsiz aýmaqqa alyp shyqty, — dep habarlady departamenttiń baspasóz qyzmeti.

Jas jigittiń mundaı oqys qadamǵa ne úshin barǵany ázirge belgisiz. Qazir ol jedel-tergeý tobyna tapsyryldy. Atalǵan oqıǵaǵa baılanysty tıisti is qujattary jınaqtalyp jatyr.

Eske sala keteıik, buǵan deıin Atyraýdaǵy qurylys alańynda 2 jumysshy 5-qabattan qulap, 1-eýi kóz jumǵanyn jazǵan bolatynbyz.