Atyraýda sý jetkizetin kásiporynǵa 12,5 mln teńge aıyppul salyndy

ATYRAÝ. KAZINFORM – Atyraý qalasy men Maqat aýdanynyń turǵyndaryn sýmen qamtıtyn kásiporynǵa 12,5 mln teńge aıyppul salyndy. Buǵan ınvestıtsııalyq baǵdarlamanyń oryndalmaýy men negizsiz kiris sebep bolǵan.

Tabıǵı monopolııalardy retteý komıteti Atyraý oblysy boıynsha departamentiniń málimetinshe, «Tabıǵı monopolııalar týraly» zańnyń 26-babynyń 2-tarmaǵynyń 16) tarmaqshasyna sáıkes, tabıǵı monopolııa sýbektisi bekitilgen ınvestıııalyq baǵdarlamany oryndaýy tıis. 

– Osyǵan baılanysty «Atyraý oblysy Sý Arnasy» MKK tarapynan 2023-2024 jyldarǵa bekitilgen ınvestıtsııalyq baǵdarlamasynyń oryndalýyna taldaý júrgizildi. Taldaý qorytyndysyna sáıkes sýdy taratýshy jeliler jáne magıstraldyq qubyrlar arqyly berý rettelip kórsetiletin qyzmetteri boıynsha 60 mln teńgeniń, ekinshiden, sarqyndy sýlardy burý jáne sarqyndy sýlardy tazartý rettelip kórsetiletin qyzmetteri boıynsha 22 mln 527 myń teńgeniń is-sharasy oryndalmaǵan, - dep habarlady jergilikti departamentten.

Sondaı-aq rettelip kórsetiletin qyzmetter boıynsha bazalyq stavkaǵa baılanysty negizsiz alynǵan kiris anyqtalǵan.

– Sýdy taratýshy jeliler jáne magıstraldyq qubyrlar arqyly berý rettelip kórsetiletin qyzmetinen 69 184 575 teńge, sarqyndy sýlardy burý jáne sarqyndy sýlardy tazartý rettelip kórsetiletin qyzmetten 25 963 405 teńge kiris túsken. Osyǵan baılanysty «Atyraý oblysy Sý Arnasy» KMK Qazaqstan Respýblıkasynyń «Ákimshilik quqyq buzýshylyq týraly» Kodeksiniń 164-babynyń 4-bóligi boıynsha 12 582 400 teńge somasynda ákimshilik aıyppul salyndy. Eki ákimshilik is boıynsha salynǵan aıyppuldardy sýbekt qysqartylǵan is júrgizýde kórsetilgen somanyń 50% mólsherinde jeti táýlik ishinde tóledi, - dep málim etti departamentten.

Eske sala ketelik, buǵan deıin Atyraýda qaldyqty ruqsatsyz jınaǵan seriktestikke 37,4 mlrd teńge aıyppul salynǵanyn habarlaǵan bolatynbyz.