Atyraýda sý tasqynynan búlingen jol áli tolyq jóndelgen joq
ATYRAÝ. KAZINFORM — Atyraý oblysynda byltyrǵy sý tasqyny kezinde búlingen joldy jóndeý áli tolyq aıaqtalǵan joq.
Atyraý oblystyq jolaýshylar kóligi jáne avtomobıl joldary basqarmasynyń bólim basshysy Nurjaý Maratovtyń aıtýynsha, byltyr kóktemde Jaıyq, Oıyl jáne Jem ózenderi arnasynan asyp, avtojol men kópirlerdi sý shaıǵan.
Sonyń saldarynan Atyraý qalasy men Mahambet, Inder, Qyzylqoǵa, Jylyoı aýdandarynyń aýmaǵynda 27,9 shaqyrym jol men 6 kópir búlingen.
— Sý tasqynynan kelgen shyǵynnyń jalpy quny - 8,8 mlrd teńge. Búlingen jol men kópirlerdi qalpyna keltirýge Úkimettiń rezervinen 5,9 mlrd, jergilikti bıýdjetten 2,8 mlrd teńge bólindi. Bul qarjyǵa 27,9 shaqyrym jol men 6 kópirdi qalpyna keltirý, 13 mal ótkeli men 49 sý ótkizgish qubyr salý josparlandy, — deıdi Nurjaý Maratov.
Taldykóldikter kúte turady
Onyń málimetinshe, Jaıyq ózeniniń tasýynan Inder, Mahambet aýdandarynyń aýmaǵymen ótetin Atyraý-Oral, Atyraý-Inder tasjoly búlingen.
Máselen, Atyraý-Inder baǵytyndaǵy joldyń jaramsyz bolǵan 300 metr bóligin qalpyna keltirýge 759 mln teńge bólingen.
Bul jumystyń merdigeri — «Kazahdorstroı» JShS. Merdiger uzyndyǵy 100 metr kópir salýy qajet.
Qazir búlingen kópirdiń tusynda aınalma jol salynǵan. Kópirdiń jobalaý-smetalyq qujattary jasaqtalyp jatyr. Biraq kópirdiń qurylysyn aldaǵy jyly aıaqtaý josparlanǵan.
— Atalǵan joldyń Mahambet aýdanynyń aýmaǵyndaǵy bóligine ortasha jóndeýdi «Atyraýjoldary» JShS júrgizedi. Oǵan 1 mlrd 503 mln teńge qaralǵan. Bul joldyń boıynda 3 mal ótkeli men 19 sý ótkizgish qubyr salý, 4 shaqyrymdy jóndeý kózdelgen. Osy kezge deıin bul jumystyń 90 paıyzy jasaldy, — deıdi bólim basshysy.
Osy aýdandaǵy Sarytoǵaı aýylyna aparatyn joldyń 300 metri men 8 sý ótkizgish qubyr qurylysyna 89 mln teńge qaralǵan. Bul isti atqarý «West Buildinq Group» JShS-ǵa júktelgen. Merdiger jumysty tolyq aıaqtaǵan.
Al byltyr turǵyndary evakýatsııalanǵan Taldykól aýylyna kiretin joldy jóndeý áli bastalmaǵan.
Munyń mynadaı sebebi bar. Búlingen joldyń jobasynda kózdelmegen kópir ótkeliniń zerthanalyq qorytyndysy jaramsyz bolǵan. Sol sebepten jobaǵa túzetý engizilgen.
Osyǵan baılanysty jóndeý jumysyn bıyl birinshi toqsanda bastaý kózdelgen. Ony «AVS Lımıted» JShS atqarady.
Al Atyraý-Oral trassasynan Inderbor kentine aparatyn 7 shaqyrymdyq joldy qalpyna keltirý úshin 550 mln teńge bólinip otyr.
Joldyń bul bóliginde ortasha jóndeý júrgizý josparlanǵan. «Kazservısgrýp» JShS bir sý ótkizgishti, 4 mal ótkeli men qosymsha aınalma jol salynǵan. Biraq áli tolyq aıaqtalmaǵan.
Oıyl endi oıran salmasa…
Qyzylqoǵa aýdanynyń aýmaǵymen ótetin Oıyl ózeni birneshe jyl qatarynan arnasy ortaıyp, ábden qurǵaýǵa shaq qalǵan edi.
Alaıda byltyr Oıyl ózeni de erneýinen asyp, turǵyndardy ábden ábigerge saldy.
Oıyldyń tasýynan Inder-Qarabaý-Mııaly-Saǵyz avtomobıl joly jaramsyz bolyp qaldy. Bul jolǵa ortasha jóndeý júrgizetin bas merdigeri — «Assana Dor Stroı» JShS. Merdiger 4,3 shaqyrym joldy jóndep, 6 mal ótkeli men 15 sý ótkizetin qubyr salady.
Al «AtyraýInjStroı-AIS» JShS kópir qurylysyn júrgizip, sý ótkizýge arnalǵan qubyrlardy ornatady.
Atalǵan jumysty atqarý 1 mlrd 323 mln teńgege baǵalanyp otyr. Qazir aýdan ortalyǵy — Mııaly aýylynyń tusynda kópir salynyp, ýaqytsha paıdalanýǵa berilgen.
Sondaı-aq oblystyq mańyzy bar joldan Qarabaý aýylyna baratyn joldy qalpyna keltirý jumysyn «Damý Qurylys» JShS júrgizgen.
Bul joldyń uzyndyǵy — 300 metr. Jol boıyna 6 sý ótkizetin qubyr ornatylǵan. Osyndaı jumystardy atqarýǵa 81 mln teńge bólinipti.
Qulsaryda tósemtas tóseldi
Byltyr sáýirde Jylyoı aýdanynda Jem ózeniniń arnasynan sý Qulsary qalasyna kirdi. Qulsary-Muqyr, Qulsary-Dossor baǵytyndaǵy joldy jyryp ketti.
Atyraý oblystyq jolaýshylar kóligi jáne avtomobıl joldary basqarmasynyń bólim basshysy Nurjaý Maratovtyń deregine qaraǵanda, bul aýdan aýmaǵyndaǵy búlingen joldy qalpyna keltirýge 2 mlrd 390 mln teńge bólingen.
Merdiger kompanııanyń biri — «Kazkomservıs» JShS jol jóndeý jumysynyń 90 paıyzyn atqarǵan.
Máselen, Qulsary qalasyndaǵy kóshelerge 17 myń sharshy metr tósemtas tóseý úshin 321 mln teńgeni qaraldy. Bul qarjyny «Ómirzaq» JShS tolyq ıgeripti.
Monoshahardyń «Dostyq» shaǵynaýdanyndaǵy avtomobıl kópirin qalpyna keltirýge 475 mln teńge bólingen. «SK Kazalem» JShS atalǵan kópirdi jóndeý byltyr 12 jeltoqsanda bastady.
Qajetti materıaldar Reseıden ákelinip, 40 adam jumysqa tartyldy. Jóndeý jumysyn naýryzda aıaqtaý josparlanyp otyr.
— Byltyr tasqyn sý kezinde búlingen jol men kópirlerdi jóndeý bastalǵanymen, kúnniń sýytýyna baılanysty toqtap qaldy. Negizgi jumystardyń basym bóligi aıaqtalýǵa jaqyndady. Kún jylynǵan soń jóndeý qaıta jalǵasady. Jobaǵa sáıkes sý ótkizgish qubyrlar, kópirler men mal ótkelderi salynyp jatyr. Bul sý tasqyn qaıtalanatyn bolsa, sý ótkizý qabiletin arttyryp, kólik qozǵalysyn toqtatpaıdy. Joldyń mańyndaǵy eldi mekenderge qaýip tóndirmeıdi, — deıdi spıker.
Eske sala ketelik, budan buryn Atyraý oblysynda byltyrǵydaı sý tasqyny qaıtalanýy múmkin ekenin jazǵan edik.