Atyraýda sý tasqyny kezinde qap tasyǵan Pshon atty ıtke eskertkish qoıyla ma
ATYRAÝ. KAZINFORM – Atyraýda kóktemgi sý tasqyny kezinde Jaıyq ózeniniń jaǵalaýynda Pshon atty ıt qap tasyǵan edi. Alaıda qarashanyń sońynda buralqy ıttermen birge júrgen ony atyp ketti.
Pshon – Atyraý oblysynyń Mahambet aýdanyndaǵy Sarytoǵaı aýylynyń turǵyny Zámzagúl Jańabaeva asyraǵan ıt. Onyń sý tasqyny kezinde qap tasyǵany da, keıin atylǵany da túrli qoǵamdyq pikirge arqaý boldy.
Iesine adaldyǵyn tanytqan ıtke eskertkish qoıylýy múmkin be? Ázirge mundaı másele qozǵalyp otyrǵan joq.
Degenmen, qazaqstandyq sheber Azamat Kenjeǵalıev Pshonnyń skýlptýralyq pishinin jasaýdy qolǵa aldy. Ol óziniń metaldan jasap jatqan eńbegin áleýmettik jelidegi paraqshasyna júktedi.
Bir ereksheligi, ıttiń pishini júrek túrindegi temir bólshekterinen qurastyrylǵan. Sheber bul jumysyn Pshonnyń atylǵannan birneshe kún ótken soń bastaǵan.
Eske sala ketelik, buǵan deıin Pshonnyń ıesi Zámzagúl Jańabaeva kúshik kezinen asyraǵan ıti qabaǵan emesin aıtqanyn habarlaǵan edik.
Keıin ıttiń ólimine baılanysty jergilikti polıtsııa qylmystyq is qozǵaǵanyn jazǵan bolatynbyz.