Atyraýdyń bas jospary: qala quramyna 8 eldimeken kirdi
ATYRAÝ. KAZINFORM – Atyraý qalasynyń jańa bas josparynda sý basý qaýpi bar aýmaqtarda, sanıtarlyq-qorǵanysh aımaqtarynda jáne ınjenerlik jelilerdiń qorǵaý beldeýlerinde ornalasqan nysandardy kezeń-kezeńimen memleket muqtajyna alyp, buzý qarastyrylǵan.
Bul másele Atyraý qalasynyń qoldanystaǵy bas josparyna ózgerister men tolyqtyrýlar engizý jobasyn talqylaý kezinde aıtyldy. «Qazgıprograd» jobalaý ınstıtýty» JShS dırektory Іlııas Temirbaevtyń málimetinshe, jańa qujatta sý basatyn aýmaqtarda, sanıtarlyq-qorǵanysh aımaqtarynda, elektr jelileri men magıstraldyq munaı qubyrlarynyń qorǵaý beldeýlerinde qurylys salýǵa shekteý qoıylady.
- Qala quramyna resmı túrde qala mańynda ornalasqan segiz eldi meken kiredi. Olar: Erkinqala, Tasqala, Jańatalap, Qyzyl balyq, Qurmanǵazy, Amangeldi, Damby jáne Besikti. Buǵan qosa, Bas jospardyń jobasynda qala qurylysyna qatysty shekteýlerdi saqtaý qarastyrylǵan. Sol sebepti sý basatyn aımaqtarda, sanıtarlyq-qorǵanysh zonalarynda, elektr jelileri men magıstraldyq munaı qubyrlaryn qorǵaý aımaqtaryndaǵy nysandar kezeń-kezeńimen memleket muqtajyna alynyp, buzylýy tıis, - dedi Іlııas Temirbaev.
Jobaǵa sáıkes, jańa zırattar qala syrtynda ornalasady. Ol úshin 105 gektar jer telimi qarastyrylǵan. Bas jospardyń taǵy bir baǵyty – kólik ınfraqurylymyn damytý. Magıstraldyq kóshelerdiń uzyndyǵyn qazirgi 264,7 shaqyrymnan 695,1 shaqyrymǵa deıin ulǵaıtý, kelesi jyly Soltústik aınalma joldyń qurylysyn aıaqtaý jáne 12 jolaıryq salý josparlanǵan.
Sondaı-aq ınjenerlik ınfraqurylymdy jańǵyrtý, gaz jáne elektr jelilerin kezeń-kezeńimen jer astymen júrgizý, jer telimderin berý tártibin jetildirý jáne sý burý júıesin qaıta qaraý usynyldy.
Aıta keteıik, Atyraý qalasynyń qoldanystaǵy bas jospary 2016 jyly bekitilgen. Oǵan ózgerister men tolyqtyrýlar engizý jumystary 2024 jyldyń mamyrynan beri júrgizilip keledi. Jobaǵa sáıkes, qazir halyq sany 431 myńnan asatyn qala men oǵan irgeles aýmaqtardyń halqy 2040 jylǵa qaraı 600 myń adamǵa deıin ósedi dep boljanyp otyr. Osyǵan baılanysty qalanyń jobalyq aýmaǵy 45 myń gektardan 56 myń gektarǵa deıin keńeıtilip, turǵyn úı qurylysy negizinen soltústik baǵytta damytylady.
Eske salaıyq, jyl basynda oblys ákiminiń orynbasary Qaırat Nurtaev jańa jospar aıasynda Atyraý qalasy eki aýdanǵa bólinýi múmkin ekenin aıtqan edi.
