Atyraýda sport klýbtarynan 251 mln teńgege jýyq zańbuzýshylyq anyqtaldy
ATYRAÝ.KAZINFORM - Atyraýdaǵy memlekettik sport klýbtary 112 mıllıon teńgeden asa bıýdjet qarajatyn tıimsiz paıdalanǵan, al 78 mıllıon teńgege jýyq qarjyny durys josparlamaǵan. Qarjylyq buzýshylyq 60 mln teńgeden asady.
Atyraý oblysy boıynsha tekserý komıssııasy oblystyq bilim berý basqarmasyna qarasty 6 balalar-jasóspirimder dene shynyqtyrý klýbyna memlekettik aýdıt júrgizip, nátıjesinde 251 mln 52 myń teńgeden astam buzýshylyq anyqtaǵan.
Aýdıt Jylyoı, Inder, Maqat, Qyzylqoǵa, Qurmanǵazy men Mahambet aýdanyndaǵy «Balalar-jasóspirimderdiń dene shynyqtyrý daıarlyq klýby» mekemesin qamtyǵan. Tekserý kezinde eńbekaqy taǵaıyndaý, is-sapar shyǵyndaryn artyq ne kem tóleý, bıýdjet qarajatyn tıimsiz josparlaý jáne jumsaý syndy faktiler boldy.
- Budan bólek tekserý komıssııasy aýdıt obektileriniń tıimdiligin baqylady. Osy 6 aýdandaǵy sport klýbtarynda ınklıýzıvti toptar ashylmaǵan. Balalardy ótkizý rásimderinde buzýshylyqtar anyqtaldy. Bul boıynsha aýdandaǵy bólimder men oblystyq basqarmaǵa tıisti tapsyrmalar beriledi,-dedi tekserý komıssııasynyń múshesi Bolat Ánjanov.
2023 – 2025 jyldar aralyǵynda atqarylǵan jumysqa júrgizilgen memlekettik aýdıt nátıjesinde 70 rásimdik buzýshylyq bolǵan. Júıeli kemshilikter de ketken.
Qarjylyq buzýshylyqtyń ishinen bıýdjet esebine 20,6 mln teńge ótelýi tıis, al qalpyna keltirýge jatatyny 39 mln teńgeden asady.
Jalpy ákimshilik quqyq buzýshylyq belgileri bar 29 fakt, memlekettik satyp alý rásimderiniń saqtalmaýy, býhalterlik esepke alýdyń qaǵıdalarynyń buzylýy, zańdy tulǵalardy memlekettik tirkeý zańnamasynyń talaptaryn buzý boıynsha materıaldar ákimshilik is júrgizýdi qozǵaý úshin ýákiletti organdarǵa joldanǵan. Búginde ýákiletti organdarmen 15 derek boıynsha 1,9 mln teńge aıyppul salynǵan.
Buǵan deıin Atyraý qalasynyń ákimdigi 10 kalkýlıatordy 3,9 mln teńgege satyp almaq bolǵanyn jazǵan edik.
