Atyraýda sport basqarmasynyń burynǵy basshysy 4, jattyqtyrýshy 3 jylǵa sottaldy

ATYRAÝ. KAZINFORM — Atyraý soty oblystyq dene shynyqtyrý jáne sport basqarmasynyń burynǵy basshysy men aǵa jattyqtyrýshyǵa qatysty úkim shyǵardy. 

Sybaılas jemqorlyqqa qarsy is-qımyl agenttigi baspasóz qyzmetiniń málimetinshe, qylmystyq is Atyraý qalasyndaǵy № 2 sotta qaralǵan.

— Bıyl 21 sáýirde Atyraý qalasynyń № 2 soty oblystyq dene shynyqtyrý jáne sport basqarmasynyń burynǵy basshysy D. Kospanovqa qatysty úkim shyǵardy. Ol «Olımpıadalyq rezervti daıyndaý ortalyǵy» KMM-nyń aǵa jattyqtyrýshysy N.Maılashevten bıýdjet qarajaty esebinen oqý-jattyǵý jıyndaryna shyǵýǵa járdemdeskeni, sondaı-aq KMM jattyqtyrýshylarynan jalpy somasy 2,4 mln teńgege jýyq aqsha qarajatyn zańsyz jınaý jolymen laýazymdyq ókilettikterin teris paıdalanǵany úshin 1,7 mln teńge somasynda para alǵan. Budan basqa, basqarma basshysy KMM-de eńbek qyzmetin is júzinde júzege asyrmaǵan adamdarǵa jalaqyny zańsyz tólep,  1,1 mln teńge somasynda bıýdjet qarajatyn jymqyrǵany úshin kináli dep tanyldy, — dep habarlady agenttiktiń baspasóz qyzmeti.

Sot úkimimen basqarmanyń burynǵy basshysy D.Qospanov 4 jylǵa, aǵa jattyqtyrýshy N.Maılashev 3 jylǵa bas bostandyǵynan aıyrylǵan. Sottalǵandar memlekettik qyzmette, sýdıada jáne jergilikti ózin-ózi basqarý organdarynda qyzmet atqarý quqyǵynan ómir boıy aıyrylǵan.

Eske sala ketelik, buǵan deıin Atyraýdyń eks-ákimi men ákimdiktiń sheneýnikterine berilgen jaza ózgerissiz qalǵanyn jazǵan bolatynbyz.