Atyraýda 5 mamandandyrylǵan sot jańa ǵımaratqa kóshti
ATYRAÝ. KAZINFORM - Atyraýda mamandandyrylǵan sottardyń jańa ǵımaratynyń saltanatty ashylýy ótti.
Rásimge Joǵarǵy Sot tóraǵasy Aslambek Merǵalıev, Sot ákimshiliginiń basshysy Naıl Ahmetzakırov, oblys ákimi Serik Shápkenov, oblystyq sottyń tóraǵasy Muhtar Parmenov jáne basqalar qatysty.
Sóz sóılegenderdiń barlyǵy memlekettiń sot bıligin damytýǵa kóńil bólip otyrǵanyn atap ótti.
4 qabatty jańa ǵımarattyń aýdany 9 myń sh.m. Onda 5 sot: ákimshilik, qylmystyq, tergeý, kámeletke tolmaǵandar isteri jáne ákimshilik quqyq buzýshylyq isteri jónindegi sottar ornalasady.
Ǵımaratta 17 sot zaly bar, onyń ekeýi alqabılerdiń qatysýymen ótetin protsesterge arnalyp jabdyqtalǵan. Buryn bul sottar apatty, tar jáne jaramsyz úı-jaılarda ornalasqan bolatyn.
Osy týraly aıta kele, A.Merǵalıev jańa ǵımarattyń sáýlettik-estetıkalyq kelbetin, onyń sot tóreligi standarttaryna sáıkestigin, zamanaýı qaýipsizdik júıesimen jáne jabdyqtarmen qamtamasyz etilgenin, bul protseske qatysýshylarǵa qolaıly jaǵdaı týǵyzatynyn atap ótti.
S.Shápkenov jańa sot ǵımaratynyń ashylýyn óńirdegi oqıǵa dep atap ótip, sottardaǵy tıimdi ózgerister zańdy jáne ádil sot sheshimderiniń qabyldanýyna yqpal etetinine toqtaldy.
M.Parmenov oblys sýdıalarynyń sot tóreligin sapaly júzege asyrýǵa bar kúsh-jigerin salatynyna senim bildirdi.
Oblystyq bıler keńesiniń tóraǵasy Ahmyrza Batyrhaıyrov quttyqtaý sóz sóıledi.
Rásimge qatysýshylar májilis zalyn, sot zaldaryn, sýdıalar kabınetin jáne basqa da úı-jaılardy aralap kórdi.
Sol kúni Joǵarǵy Sot tóraǵasy men Sot ákimshiliginiń basshysy oblystyq sot korpýsymen kezdesti. Onyń barysynda oblystyq sot alqalarynyń tóraǵalary Tátti Ýálıeva, Máten Erǵazıev jáne Anargúl Salıhova, sondaı-aq oblystyq sottyń tóraǵasy Muhtar Parmenov óz jumystary týraly aıtty.
Joǵarǵy Sot tóraǵasy sybaılas jemqorlyqqa qarsy qabyldanyp jatqan sharalarǵa, azamattarǵa iltıpatpen qaraýǵa, memlekettik qyzmetshilerdiń ádepti saqtaýyna toqtalyp, sot júıesiniń basym baǵyttary týraly habardar etti.
«Qoǵam bizden ádil jáne beıtarap sot tóreligin kútedi. Sottarda adamdar aqıqat pen qorǵan taba alatyn ádilet saraıyna kirgenin tabaldyryqtan sezinýi kerek», - dedi ol.
Sońynda A.Merǵalıev oblystyq sottyń otstavkadaǵy sýdıalary Gúlnár Qarabalına men Ádil Quspanovty «Minsiz qyzmeti úshin» medalimen marapattady.
