Atyraýda sorǵy stansasyndaǵy apattan bir shaǵyn aýdan turǵyndary 3 kúnnen beri sýsyz otyr

ATYRAÝ. KAZINFORM — Atyraý qalasyndaǵy «Nursaıa» shaǵyn aýdanynda úsh kúnnen beri sýsyz otyr. Buǵan káriz-sorǵy stansasyndaǵy apat sebep bolǵan.

«Nursaıa» — keıingi jyldary boı kótergen shaǵyn aýdan. Munda turǵyn úıler, aýrýhana, mektep, balabaqsha sekildi áleýmettik nysandar salynǵan. Úsh kúnnen beri shaǵyn aýdan turǵyndary áleýmettik jelide sýdyń joqtyǵyna baılanysty shaǵym aıtyp jatyr.

Osyǵan baılanysty sýmen jabdyqtaýshy kásiporyn arnaıy aqparat taratty.

«Kommýnıkatsııalardyń shamadan tys júktelýine, normadan artyq jaýyn-shashynnyń túsýine baılanysty apattyń sebebin anyqtaý múmkin bolmaǵan edi. Sol sebepten, «Nursaıa» shaǵyn aýdanynda sý berýdi ýaqytsha shekteý týraly sheshim qabyldandy. Sýmen qamtý kestege sáıkes júrgizildi», -dep habarlady «Atyraý oblysy Sý Arnasy» KMK-dan.

Atyraý oblysy ákiminiń orynbasary Jasulan Bısembıevtiń aıtýynsha, «Atyraý oblysy Sý Arnasy» KMK-nyń jóndeý brıgadalary apat saldaryn joıý jumysyn júrgizýdi qolǵa alǵan.

«Apat sebebi búgin anyqtaldy. Qazir jóndeý jumysy júrip jatyr. Jaqyn arada sýmen tolyq qamtamasyz etý jáne drenaj júıesi qalpyna keltiriledi», -dep málim etti Jasulan Bısembıev.

Eske sala ketelik, buǵan deıin Atyraýdyń keıbir bóligi men oǵan irgeles eldi mekenderde jaryq óship qalǵanyn jazǵan bolatynbyz.