Atyraýda sıntetıkalyq esirtki tasymaldaǵan kúdikti kúzetshi bolyp jumys istegen
Atyraýda kúzetshi bolyp jumys isteıtin kúdiktiniń esirtki tasymaldaǵany anyqtalyp otyr. Kúdikti ótken aıda Jaıyq ózeniniń jaǵalaýynan ustalǵan, dep habarlaıdy Kazinform.
Atyraý oblystyq polıtsııa departamenti baspasóz qyzmetiniń aqparatyna qaraǵanda, kúdiktiniń jasy – 41-de.
«Esirtki qylmysyna qarsy is-qımyl basqarmasynyń qyzmetkerleri jedel izdestirý is-sharalary kezinde Atyraý qalasynyń aýmaǵynda esirtki zattaryn jasyryn tyǵý ádisimen saqtaý kúdigine ilingen 1982 jylǵy er adamdy anyqtaǵan edi. Jaıyq ózeniniń jaǵalaýynda ustalǵan kúdiktini tekserý kezinde syrt kıiminen, turǵylyqty meken-jaıynan qara ızolentke oralǵan 15, jasyrýǵa daıyndalǵan 4 orama esirtki tabylyp, tárkilendi. Kúdiktiden tárkilengen zattarǵa saraptama jasaldy. Saraptama qorytyndysymen 80-nen astam doza bolatyn 25,10 gramm mefedron sıntetıkalyq esirtkisi ekeni dáleldendi», -dep habarlady departamenttiń baspasóz qyzmeti.
Kúdikti Atyraý qalasyndaǵy mekemelerdiń birinde kúzetshi bolyp jumys istegen. Jumystan bos kezinde sıntetıkalyq esirtkini jasyryn tyǵý ádisi arqyly paıda tappaq bolǵan.
«Qazir kúdiktige qatysty QR Qylmystyq Kodeksiniń 297-babynyń 3-bóliginiń 3)tarmaǵymen sotqa deıingi tergep-tekserý júrgizilip jatyr. Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy. Qazaqstan Respýblıkasy Konstıtýtsııasynyń 77-baby 3-tarmaǵynyń 1-tarmaqshasy, QR Qylmystyq-protsestik kodeksiniń 19-babynyń 1-bóligine sáıkes adamnyń kináli ekendigi zańdy kúshine engen sot úkimimen tanylǵansha ol jasalǵan qylmysqa kináli emes dep esepteledi», -dep málim etti departamenttiń baspasóz qyzmetinen.
Eske sala ketelik, buǵan deıin BQO turǵyny 600 doza esirtkimen ustalǵanyn jazǵan edik.
