Atyraýda shóptiń bir oramy 6,5-12 myń teńgege satylyp jatyr
ATYRAÝ. KAZINFORM – Atyraý oblysynda qysqy mal qystatý maýsymyna qajetti mal azyǵyn daıyndaý jumystary jalǵasyp jatyr. Búginge deıin 267,4 myń tonna mal azyǵy ázirlenip, jospardyń 42,7%-y oryndaldy.
Atyraý oblystyq aýyl sharýashylyǵy jáne jer qatynastary basqarmasynyń málimetinshe, bıyl óńirde 626,5 myń tonna iri sabaqty mal azyǵyn, 4 myń tonna súrlem men 45,8 myń tonna qurama jem daıyndaý josparlanǵan. Onyń ishinde 55,1 myń tonnasy – ótken jyldan qalǵan qor.
Búginge deıin oblys boıynsha 267,4 myń tonna mal azyǵy ázirlendi. Naýqanǵa 741 traktor, 603 shóp shabatyn agregat jáne 702 tasymaldaý tehnıkasy jumyldyrylyp, 1160 adam eńbek etip jatyr.
Basqarmanyń bólim basshysy Jasulan Sultanǵalıevtiń aıtýynsha, mal azyǵy baǵasyn turaqtandyrý úshin aýdandarda birqatar shara qabyldanǵan.
– Mal azyǵy baǵasyn turaqtandyrý maqsatynda mal azyǵyn daıyndaýshy sharýashylyqtar men aýyldyq okrýg ákimdikteri arasynda 78 memorandým jasaldy. Osy kelisimder aıasynda bir rýlon shóptiń baǵasy 6 500–8 500 teńge kóleminde belgilendi. Oblys boıynsha qurama jem satatyn 34 saýda orny jumys isteıdi. Qurama jemdi satyp alýdyń negizgi kezeńi kúz aılarynda bastalady, – dedi Jasulan Sultanǵalıev.
Óńirge qajetti iri sabaqty mal azyǵynyń shamamen 25 paıyzy syrttan jetkiziledi. Sondaı-aq qurama jemniń basym bóligi Batys Qazaqstan jáne Aqtóbe oblystarynan tasymaldanady.
Qazirgi tańda naryqta bir rýlon shóptiń baǵasy jetkizý qashyqtyǵyna, aýdan men ónim sapasyna qaraı 6 500 teńgeden 12 myń teńgege deıin jetedi.
Oblysta búginde 262 myńnan astam iri qara, 646 myńnan astam qoı-eshki, 165 myńnan astam jylqy jáne 46 myńnan astam túıe ósiriledi. Aýyl sharýashylyǵy maqsatyndaǵy jer kólemi 3 mıllıon gektardan asady. Onyń 2,9 mıllıon gektary jaıylym, al 44,3 myń gektary shabyndyq jerdi quraıdy.
Jalpy aýyl sharýashylyǵynyń málimetine súıensek elimizde 15,9 mln tonna jemshóp daıyndaldy.
