Atyraýda shomylý maýsymyn ashý merzimi taǵy da keıinge qaldy
ATYRAÝ.KAZINFORM — Osy joly da oblys ákimdiginiń shomylý maýsymyn jazdyń alǵashqy kúninde ashý jospary oryndalmady. Tótenshe jaǵdaılar departamenti óńirde belgilengen 12 jaǵalaýdyń birde biri daıyn emes ekenin málimdedi. Atyraýda sýǵa shomylý maýsymy naqty qashan bastalatyny belgisiz.
Ótken aptada óńir basshysynyń orynbasary Qaırat Nurtaevtyń tóraǵalyǵymen osy máselege baılanysty arnaıy keńes otyrysy ótken edi. Sol kezde óńirdegi jaǵajaılardyń daıyn emes ekeni aıtylyp, sheneýnikter bastalǵan jumysty jedel aıaqtap, qaýipsizdik sharalaryn kúsheıtý kerektigi týraly tapsyrma aldy. Bir qyzyǵy, Atyraý qalasyndaǵy 3 jaǵajaıdy daıyndaý týraly quny 91 mln 345 myń teńge bolatyn tender osy aptanyń basynda qorytyndylanyp, tarazdyq kompanııa 91 mln teńgege utyp aldy. Alaıda taraptar arasynda áli kelisimshart jasalmaǵan. Óıtkeni, konkýrs nátıjesi shaǵymdaný satysynda tur.
Oblystyq TJD aqparatyna súıensek, Jaıyq ózeniniń qaladaǵy Balyqshy, Geolog yqshamaýdanyndaǵy arnaıy oryndary jáne Turǵyndar qalashyǵy yqshamaýdanyndaǵy Malıbý jaǵajaıyn ashý josparlanǵan. Sonymen qatar, 4 oryn Erkinqala, Atyraý, Almaly, Qaıyrshaqty aýyldyq okrýgterinde belgilengen.
Búginde bıliktiń jospary ózgerdi. Jergilikti atqarýshy organ jaǵajaılardy daıyndaý jumysyn bastap, maýsym aıynyń sońyna deıin aıaqtamaq nıette.
— Josparǵa sáıkes jaǵajaı aýmaqtaryn tegisteý, qum tóseý, jaryqtandyrý júıelerin ornatý, kıim aýystyrý kabınalaryn, sanıtarlyq toraptardy jáne qutqarý munaralaryn ornalastyrý kózdelgen. Barlyq qajetti jumysty maýsym aıynyń sońyna deıin aıaqtaý josparlanyp otyr. Sonymen qatar jaǵajaılardyń paıdalanýǵa berilýi tek ınfraqurylymdyq daıyndyqqa ǵana emes, sý aıdyndarynyń qaýipsizdik talaptaryna sáıkestigine de baılanysty, — dep málimdedi Atyraý qalasynyń ákimdigi.
Qazir Jaıyq ózenindegi sý deńgeıi tolyq turaqtalǵan joq, aǵys qarqyny saqtalyp otyr, sondaı-aq sýdyń laılanýy joǵary bolǵandyqtan onyń tuný protsesi aıaqtalmaǵan. Osyǵan baılanysty turǵyndardyń qaýipsizdigin qamtamasyz etý maqsatynda shomylýǵa ruqsat berilgen joq.
TJD málimetinshe, aýdandarda da sýǵa túsýge arnalǵan jaǵajaı daıyn emes. Jalpy jospar boıynsha tómendegi oryndarda sýǵa túsýge ruqsat berilýi tıis edi.
Jylyoı aýdany:
Qulsary qalasyndaǵy Qamyskól kóliniń jaǵalaýynda arnaıy oryn daıyndalý qajet.
Inder aýdany:
Jaıyq ózeniniń Inderbor kentindegi ortalyq kópirdiń sol jaq betinde jazdyq jaǵajaı bolýy tıis.
Qurmanǵazy aýdany:
Qıǵash ózeniniń Birlik aýyldyq okrýginde, Sharon ózeniniń Orly aýylyndaǵy jaǵalaýynan oryn qarastyrylǵan.
Qyzylqoǵa aýdany:
Oıyl ózeniniń Mııaly aýyldyq okrýgindegi tusynan 2 oryn belgilengen. Olar: Etnoaýyl jáne Jaǵalaý ýchaskesi.
TJD resmı aqparatyna súıensek, 2025 jyly shomylý maýsymy kezinde oblys aýmaǵynda sýǵa batyp ketip, kóz jumǵandar sany 2024 jylmen salystyrǵanda 20%-ǵa azaıǵan. Ótken jyly óńirde 11 adam, onyń ishinde 5 bala sýǵa batyp ketti. 2025 jyly shomylý maýsymynda kezinde 7 adam, onyń ishinde 1 bala qutqarylǵan.
Eske sala keteıik, bıyl 25 maýsymda Qurmanǵazy aýdanyna qarasty Nurjaý aýylyndaǵy Sharon ózeninde ruqsat etilmegen jerge 10 jastaǵy bala sýǵa túsip, batyp ketti.
