Atyraýda shyǵarmashylyq úıirmeler talapqa sáıkes emes ǵımarattarda ornalasqan

Atyraý oblysynda memlekettik tapsyrys negizinde ashylǵan shyǵarmashylyq úıirmeler talapqa sáıkes emes ǵımarattarǵa ornalasqan. Olardyń keıbiri dárihana, kommýnaldyq bazardyń ákimshilik ǵımaratynda otyr, dep habarlaıdy Kazinform agenttigi. 

Atyraý oblystyq tekserý komıssııasynyń múshesi Lázzat Aqqajıevanyń aıtýynsha, qalalyq jáne aýdandyq mádenıet, tilderdi damytý, dene shynyqtyrý jáne sport bólimderine bólingen bıýdjet qarajatyna memlekettik aýdıt júrgizilgen.

«Aýdıt qorytyndysy boıynsha quny 426,5 mln teńge bolatyn quqyqbuzýshylyq anyqtaldy. Onyń ishinde qarjylyq buzýshylyq kólemi – 6,5 mln teńge. Al tıimsiz josparlanǵan bıýdjet qarajaty 317,2 mln teńge boldy. Bıýdjettiń 102,6 mln teńgesi tıimsiz paıdalanylǵan. Rásimdik sıpattaǵy 147 buzýshylyqqa jol berilgen. Mundaı buzýshylyqtar bıýdjet kodeksiniń, Eńbek kodeksiniń, «Memlekettik satyp alý týraly» zańnyń, bıýdjet qarajaty esebinen qyzmettik issaparlarǵa arnalǵan shyǵystardy óteý qaǵıdalarynyń talaptaryn jetkilikti deńgeıde basshylyqqa almaý saldarynan bolyp otyr. Memlekettik tapsyrys negizinde ashylǵan shyǵarmashylyq úıirmeler talapqa sáıkes emes ǵımarattarda ornalastyrylǵan. Onyń keıbiri keńse, tehnıkalyq qyzmet kórsetý jáne bıznes ortalyqtarynda, dárihana, tsokoldi úı-jaılarda, «Saraıshyq» kommýnaldyq bazarynyń ákimshilik ǵımaraty sekildi nysandarda otyr», - dedi Lázzat Aqqajıeva.

Onyń málimetinshe, halyq shyǵarmashylyǵyn, etnomádenı dástúrler men ádet-ǵuryptardy saqtaý, nasıhattaý úshin qosymsha 35 paıyzdyq aqy negizsiz tólengen. Artyq tólengen qarjy – 2,1 mln teńge.

Eske sala ketelik, budan buryn Atyraýda memlekettik qyzmetshilerge issapar úshin 27 mln teńge keshiktirilip tólengenin habarlaǵan edik.