Atyraýda sheneýnikter ata-anasyz erjetip jatqan balalarǵa qamqor bolady

ATYRAÝ. KAZINFORM — Atyraýda oblystyq basqarmalar otbasy úlgisindegi balalar aýylynyń tárbıelenýshilerin qamqorlyǵyna alady. Ár basqarmaǵa 3-4 baladan bólingen.  

Otbasy úlgisindegi balalar aýyly jáne jasóspirimder úıi dırektory Qasym Muqashevtiń aıtýynsha, jyl saıyn tárbıelenýshilerdiń sany azaıyp keledi.

«Byltyr munda 62 jetkinshek tárbıelengen edi. Qazir 49 bala bar. Endi ár basqarmanyń qamqorlyǵyna jas ereksheligine baılanysty 3-4 baladan bólip otyrmyz. Maqsat — balalardy qoǵamǵa beıimdep, jan-jaqty jetilýine qoldaý kórsetý. Al, basqarmalardyń jaýapty mamandary ata-ana qamqorlyǵynsyz qalǵan balalardyń qala aýmaǵynda erkin júrýine, túrli ádebı-mádenı is-sharalarǵa qatysýyna kómek kórsetedi. Mamandyq tańdaýyna, jumysqa ornalasýyna keńes beredi», -deıdi Qasym Muqashev. 

Oblystyq jumyspen qamtýdy úılestirý jáne áleýmettik baǵdarlamalar basqarmasyna 3 bala bólingen.

Basqarma mamandary otbasy úlgisindegi balalar aýylyna baryp, balalarmen tanysty. 

«Bizdiń basqarmanyń qamqorlyǵyna berilgen 3 balanyń ekeýi — ul, bireýi — qyz. Olarmen erkin formatta áńgimelestik. Aldaǵy ýaqytta balalardyń qyzyǵýshylyǵyn zerttep, túrli is-sharaǵa qatystyrýdy josparlap otyrmyz. Bul — jaqsy bastama. Ata-ana qamqorlyǵynsyz ósip jatqan balalarǵa ómirge beıimdelýine kómek bolatyn baǵyt-baǵdar bergimiz keledi», -deıdi basqarmanyń bas mamany Berik Kenjeǵalı.

Eske sala ketelik, byltyr Atyraýda​ balalar aýylynyń dırektory jumysynan shettetilgenin habarlaǵan edik. 

Keıin balalar aýylyna jańa dırektor taǵaıyndaldy.