Atyraýda shekaradaǵy 10 aýylǵa baratyn jolǵa asfalt qashan tóseledi

ATYRAÝ. KAZINFORM — Atyraý oblysynyń Reseı Federatsııasymen shekaradaǵy 10 aýylǵa baratyn asfalt joq. Bul aýyldarda 7 myń jýyq adam turady.

Joldy jóndeý 4 jylǵa sozylady

Atyraý oblysynyń ákimi Serik Shápkenovtiń aıtýynsha, úsh aýdandaǵy aýyldarǵa jol salynbaǵan.

— Bizdiń oblysta joly joq eldi mekender Qyzylqoǵa, Isataı jáne Qurmanǵazy aýdanynda bar. Qyzylqoǵa aýdanyndaǵy Mııalydan Taısoıǵan aýylyna baratyn joldyń qurylysy aıaqtaldy. Isataı aýdanynda Qyzylúı jáne Jasqaırat aýyldaryna jol salý qajet. Qyzylúı aýylyna deıingi joldy salatyn merdiger anyqtaldy. Bıyl jol qurylysy bastalady, — deıdi Serik Shápkenov. 

Ákimniń deregine qaraǵanda, Qurmanǵazy aýdanyndaǵy № 7 razezd-Asan-Balqudyq-Súıindik baǵytyna qatynaıtyn joldyń uzyndyǵy — 282 shaqyrym. 

— Qurmanǵazy aýdanynyń Azǵyr óńirindegi aýyldarda 7 myńǵa jýyq adam turady. Bul aýyldarǵa baratyn jol keńes dáýirinde de salynbady. Bıyl ataldyń joldyń 0-36 shaqyrymy aralyǵynjaǵy jóndeýdi bastap, kelesi jyly bitirýimiz kerek. Qarjysy qarastyryldy. Biraq, joldyń boıynda sor jáne qumdy jerler bar. Sondyqtan tehnıkalyq sheshimderdi kútip qaldyq. Qazir jol qurylysynyń jobasy aıaqtala keldi, — dedi Serik Shápkenov.

Jobaǵa sáıkes jol qurylysy 4 kezeńge bólingen. Alǵashqysy — 0-36 shaqyrym aralyǵy. Ekinshisi — 36-98, úshinshisi — 98-180, sonan soń 180-282 shaqyrymyn jóndeý kózdelgen. 

Oblys ákiminiń málim etýinshe, qazir birinshi kezeńge sáıkes 10 shaqyrym jolda jumys júrip jatyr. Joldyń negizgi tabany qyrylyp-tegistelip, asfalt tóseýge daıyndalǵan. 

— Bul joldyń qurylysy 4 jylda bitedi. Biraq 4 jyl boıy joldy kútip-ustaýǵa aqsha bólinbeıdi emes. Sebebi, buryn bul joldaǵy qatynasty úzbeý úshin kútip-ustaý jumysyna qarjy bólinbedi. Bıyl buǵan 169 mln teńge qaralyp, kúndelikti jumys atqarylyp otyr, — dedi oblys ákimi. 

Onyń aıtýynsha, atalǵan joldaǵy kútip-ustaý jumysyna udaıy nazar aýdarylady. 

— Joldy kútip ustamasa, tez tozady. Qaıtadan qarjy bólip, jóndeý júrgizýge týra keledi. Sondyqtan, bul jumys asfalt salynǵannan keıin de júrgiziledi, — dep málim etti Serik Shápkenov.

Reseıge tike shyǵatyn jol salynýy múmkin

Bolashaqta kórshiles Batys Qazaqstan oblysynyń Reseımen shekarasyndaǵy ótkizý pýnktine deıin jol salý jaıy oılastyrylyp jatyr.

— Biz Súıindik aýylyna deıin sozylatyn joldan tikeleı shekaradaǵy ótkizý pýnktine jol salý máselesine nazar aýdaryp otyrmyz. Bul josparymyzdy iske asyra slsaq, kórshi elmen baılanysty odan ári jandandyratyn kúretamyr bolar edi. Sondyqtan osy máseleni Astrahan oblysynyń basshylarymen kezdesýde kóterdim, — dedi Serik Shápkenov.

Aýyz sý tapshylyǵy týyndaı ma?

Atyraý oblysynyń ákimi Serik Shápkenovtiń pikirinshe, kórshi elmen shekaradaǵy aýyldardyń túıtkili tek jol máselesimen shektelmeıdi.

— Qazir Qoıandy sý qubyrymen aýyz sý beriledi. Bolashaqta sý tapshylyǵy bolýy múmkin degen másele týyndap otyr. Óńirdegi Qoıandy, Taısoıǵan jerasty sý kózderine zertteý júrgizýdi, máselen, qosymsha uńǵymalar qazýdy qarastyra bastadyq. Bul bir jaǵynan shekaradaǵy aýyldarda turǵyndardyń áleýmettik jaǵdaıyna yqpal etedi. Sondyqtan olarǵa jaǵdaı jasaýymyz qajet, — deıdi oblys ákimi. 

Qurmanǵazy aýdanyndaǵy Qoıandy ken ornynyń jerasty sýy 10-27 metr tereńdikten alynady. Munda uńǵymalardyń debıti — 2,3-5,4 lıtrden 8 lıtrge deıin.

Sýdyń mıneraldylyǵy 0,4-1,5-ten 1,7-4,7 g/lıtrge deıin qubylyp turady. Munda buryn sý beretin 16 uńǵyma bolǵan. Odan táýligine 7,2 myń tekshe metr sý alynǵan. 

Al 2023 jyly Qoıandy toptyq sý qubyry úshin 6 uńǵyma qazylǵan. Bul qubyrmen Balqudyq, Súıindik, Azǵyr, Asan aýyldaryna sý jetkiziledi. 

Ákimdiktiń málimetinshe, Súıindik-Asan-Úshtaǵan aýyldaryna magıstraldy sý qubyry jelisi júrgizilgen. Jobanyń uzyndyǵy — 102,91 shaqyrym. Sondaı-aq, Asan aýylyndaǵy turǵyn úıler úshin 5,9 shaqyrym, Úshtaǵan aýylynda 7,6 shaqyrym sý qubyry tartylǵan. 

Eske sala ketelik, budan buryn Reseımen shekaradaǵy 10 aýylǵa baratyn jolda áli kúnge asfalt tóselmegenin jazǵan edik.