Atyraýda shekara mańyndaǵy aýylda lotos gúldedi
ATYRAÝ. KAZINFORM – Atyraý oblysynyń Qurmanǵazy aýdanyndaǵy shekaraǵa jaqyn Kóptoǵaı aýyly mańynan Qazaqstannyń «Qyzyl kitabyna» engen lotos gúldeıtin úshinshi tabıǵı aýmaq anyqtaldy. Sırek ósimdik Dóleńki ózeginde ósip tur.
Tuńǵıyq dep te atalatyn gúldiń bul túri Qurmanǵazy aýdanyna qarasty Kóptoǵaı aýylynan ortalyǵynan shamamen 10 shaqyrym qashyqtyqta ornalasqan. Gúl alqaby aıtarlyqtaı úlken emes. Aýyl turǵyndary osy aýmaqtan lotosty sońǵy úsh jyldan beri baıqapty. Degenmen bul týraly kópshilik bile bermeıdi. Óıtkeni, qalyń shóp men aǵashtardan ózen betindegi sulýlyqty baıqaý qıyn.
Aıta keteıik, lotos gúldegen eń úlken aýmaq Qurmanǵazy aýdanyndaǵy Qıǵash ózeniniń salasynda ornalasqan. Alqap kólemi shamamen 5 gektardy quraıdy. Bul aýmaq týraly jergilikti turǵyndar da, týrıster de kópten beri habardar.
Shilde aıynda tuńǵıyq gúl Atyraý qalasyndaǵy Peretaska ózeginde gúldep shyqty.
Lotos – memleket qorǵaýyndaǵy sırek kezdesetin ósimdik. Ony julýǵa, syndyrýǵa, zaqymdaýǵa nemese zańsyz jınaýǵa tyıym salynǵan. Zań talaptaryn buzǵandarǵa 13 mln teńgege jýyq kólemde aıyppul salynýy nemese zańda kózdelgen ózge de jaza qoldanylýy múmkin.
15-16 tamyz kúni Qurmanǵazy aýdanynyń Teńiz aýylynda ekinshi ret lotos festıvali ótetinin eske salaıyq.
