Atyraýda shegirtkege qarsy kúreske 250 mln teńge bólindi
ATYRAÝ. KAZINFORM – Atyraý oblysynda shegirtkege qarsy kúres sharalaryna jergilikti bıýdjetten 250 mıllıon teńge qarjy bólindi.
Óńirde bıyl zııankesterge qarsy hımııalyq óńdeý jumystary aýqymdy kólemde júrgizilmek. Jalpy 114 myń gektar jer shegirtkege qarsy ýlanatyn bolady. Onyń ishinde 79 myń gektar alqap respýblıkalyq bıýdjet esebinen úıirli shegirtkege qarsy óńdelse, 35 myń gektardan astam aýmaqta jergilikti bıýdjet qarjysyna saıaq shegirtkege qarsy kúres júrgiziledi.
Atyraý oblystyq Aýyl sharýashylyǵy jáne jer qatynastary basqarmasynyń málimetinshe, qazirgi ýaqytta memlekettik satyp alý konkýrsy tolyq aıaqtalyp, merdiger uıym anyqtalǵan.
Hımııalyq óńdeý jumystary dástúrli túrde mamyr-maýsym aılarynda júrgiziledi. Sharalar oblystyń jeti aýmaǵynda júzege asady. Atap aıtqanda, Atyraý qalasy, Isataı, Qurmanǵazy, Qyzylqoǵa, Inder, Mahambet jáne Jylyoı aýdandary qamtylady.
- Jumysqa shamamen 160 adam jumyldyrylady. Sonymen qatar jergilikti bıýdjet esebinen 8 dana jerústi gazogenerator tehnıkasy tartylady. Respýblıkalyq deńgeıde uıymdastyrylǵan jumysqa 2 jerústi gazogeneratory men 3 deltaplan paıdalanylady. Eń aýqymdy jumys Qurmanǵazy jáne Qyzylqoǵa aýdandarynda júrgiziledi, - dedi Atyraý oblystyq Aýyl sharýashylyǵy jáne jer qatynastary basqarmasy basshysynyń orynbasary Azat Qapanov.
Mamandardyń sózinshe, basymdyq eń aldymen egis alqaptaryna beriledi.
Jalpy Qazaqstanda bıyl úıirli shegirtke zııankesterine qarsy hımııalyq óńdeý jumystarynyń boljamdy kólemi 2,2 mln gektar.
