Atyraýda shaǵyn jáne orta bıznes 1,4 trln teńgeniń ónimin óndirdi
ATYRAÝ. KAZINFORM – Atyraý oblysynda 2026 jyldyń birinshi toqsanynda shaǵyn jáne orta bıznes sýbektileri 1,4 trln teńgeniń ónimin óndirdi, dep habarlaıdy Atyraý oblysynyń ákimdigi.
Bul týraly baqylaý jáne qadaǵalaý organdarynyń bıznes-qoǵamdastyq aldyndaǵy Biryńǵaı esep berý kúninde aıtyldy. Jıynǵa oblys ákimi Bolat Aqsholaqov, oblys prokýrory Madııar Basshybaev, memlekettik organdardyń basshylary, Kásipkerler palatasy men bıznes ókilderi qatysty.
– 2026 jyldyń birinshi toqsanynda shaǵyn jáne orta bıznes sýbektileri 1,4 trln teńgeniń ónimin óndirdi. Olardyń jalpy óńirlik ónimdegi úlesi 29,2%-ǵa jetti. Bıznes júrgizýge qolaıly jaǵdaı jasaý jáne kásipkerlerdiń quqyǵyn qorǵaý memlekettik organdar jumysynyń mańyzdy baǵyttary qatarynda qala beredi, – dedi Bolat Aqsholaqov.
Qazir óńirde 60 myńnan astam shaǵyn jáne orta bıznes sýbektisi jumys isteıdi. Olarda 125 myńnan astam adam eńbek etedi. Bıyl bıznesti qoldaýǵa 6,3 mlrd teńge qarastyrylǵan.
Kezdesý ashyq mıkrofon formatynda ótti. Kásipkerler bıznes júrgizýge qajetti aqparatty bir jerden alýǵa múmkindik beretin tsıfrlyq platforma qurýdy usyndy.
Oblys ákiminiń aıtýynsha, kelesi jyldan bastap áleýmettik sala, kadastr, qurylys, jobalaý-smetalyq qujattamany tirkeý jáne baqylaý rásimderin qosa alǵanda, memlekettik qyzmetterdi kezeń-kezeńimen tsıfrlyq formatqa kóshirý kózdelip otyr. Bul jumysty 2028 jylǵa deıin aıaqtaý josparlanǵan.
Kezdesýde sondaı-aq aýmaqtardy kógaldandyrý, Atyraýdyń dızaın-kodyna sáıkes qalany abattandyrý úshin shyny qaldyqtaryn qaıta óńdeý, jer ýchaskelerin bólý jáne elektr energııasynyń tarıfteri máseleleri talqylandy.
Kásipkerler kótergen barlyq másele hattamaǵa engizildi. Ár ótinishti kezeń-kezeńimen sheshý kestesi jasalady. Al birqatar kásipker óz saýalyna kezdesý barysynda jaýap aldy.
