Atyraýda seriktestik dırektorynan 6 mln teńge para alǵan sheneýnik 4 jylǵa sottaldy

ATYRAÝ. KAZINFORM – Atyraýda seriktestik dırektorynan 6 mln teńge para alǵan sheneýnik 4 jylǵa sottaldy.

Bul is Atyraý qalasynyń №2 sotynda qaraldy. Kúdiktige qomaqty mólsherde para berýge ıtermeleý (QK-niń 28-babynyń 4-bóligi, 367-babynyń 2-bóligi), aldaý jáne senimge qııanat jasaý arqyly asa iri mólsherde bótenniń múlkin urlaýǵa oqtalǵany úshin (QK-niń 24-babynyń 3-bóligi, QK-niń 190-babynyń 3-bóliginiń 1, 2-tarmaqtary) aıyp taǵylǵan.

«Memlekettik eńbek ınspektsııasy basqarmasy eńbekti qorǵaý jáne qaýipsizdik bóliminiń basshysy JShS dırektoryn (oǵan qatysty qylmystyq is tirkelgen) laýazymdy tulǵaǵa para berýge kóndirgen. Ony aldap, apatty jaǵdaıdy arnaıy tekserý komıssııasynyń aktisin aqyly negizde ózgertýge bolatynyn aıtqan. Sottalýshy atalǵan máseleni oń sheshkeni úshin JShS dırektorynan 6 mln teńge alǵan», - dep habarlady oblystyq sottyń baspasóz qyzmeti.

Sottalýshynyń kinási jábirlenýshiniń, kýálardyń aıǵaqtarymen, jasyryn tergeý áreketteriniń nátıjelerimen, jeke tintý hattamasymen, sot beıne-fonografııalyq jáne sot-psıhologııalyq-fılologııalyq saraptamalarynyń qorytyndysymen dáleldengen.

«Sottalýshy taǵylǵan aıyp boıynsha kináli dep tanyldy. Oǵan memlekettik qyzmette laýazymdardy atqarý quqyǵynan ómir boıyna jáne 4 jylǵa bas bostandyǵynan aıyrý jazasy taǵaıyndaldy», - dep málim etti sottyń baspasóz qyzmetinen.

Sottyń úkimi zańdy kúshine engen joq.

Eske sala ketelik, buǵan deıin Atyraý munaı óńdeý zaýytynyń burynǵy bas dırektory 2 aı úıqamaqta otyratynyn jazǵan edik.