Atyraýda saıabaq jerin ǵımarat salýǵa bergen ákim jumystan bosatyldy

ATYRAÝ.KAZINFORM — Mahambet aýdanyna qarasty Mahambet aýyldyq okrýginiń ákimdigi saıabaq aýmaǵyn polıtsııa bólimine arnalǵan jańa ǵımarat salý úshin berip, sheshim shyǵarǵan. 

Oblystyq prokýratýra taratqan resmı málimetke súıensek, Mahambet aýyldyq okrýginiń ákimdigi bul qurylys úshin zań men bas jospardy elemeı, 2 gektar alqaptaǵy jasyl jelekti otap tastaýǵa daıyn bolǵan.

— Bul sheshim ekologııa jáne jer kodeksteriniń talaptaryna qaıshy. Prokýrorlyq qadaǵalaý aktilerin qaraý nátıjesinde zańsyz sheshimniń kúshi joıylyp, Mahambet aýdany ákiminiń orynbasary, aýdandyq jer qatynastary men qurylys bólimderiniń basshylary, «Azamattarǵa arnalǵan úkimet» memlekettik korporatsııasynyń Mahambet aýdandyq fılıalynyń basshysy tártiptik jaýapkershilikke tartyldy. Zańbuzýshylyqtarǵa jol bergen Mahambet aýyldyq okrýginiń ákimi qyzmetinen bosatyldy, — dedi Mahambet aýdanynyń prokýrory Ádilet Nurbaev.

Quqyq qorǵaý organdary ókilderiniń sózinshe, osy is-sharalardyń arqasynda aýdannyń ekojúıesi men «Taza Qazaqstan» baǵdarlamasynyń mańyzdylyǵy saqtaldy.

Osyǵan deıin Atyraýda mádenıet basqarmasy qyzmettik úıdi úsh ese qymbatqa almaq bolǵanyn habarladyq.