Atyraýda saýda ortalyǵyndaǵy oıyn alańynda 10 jasar qyz bıikten qulap, jaraqat alǵan
ATYRAÝ. KAZINFORM – Atyraýda saýda ortalyǵyndaǵy oıyn alańynda 10 jasar qyz bıikten qulap, jaraqat alǵan.
Oqıǵa, 9 mamyr kúni keshki mezgilde Atyraý qalasynda ornalasqan saýda ortalyǵyndaǵy oıyn alańynda bolǵan.
Oıyn alańyndaǵy qorǵanysh beldigi úzilip, jasóspirim bıikten qulaǵan. Soǵan baılanysty ata-anasy oqıǵa ornyna jedel járdem brıgadasyn shaqyrǵan.
«Jedel járdem brıgadasynyń dárigerleri jasóspirimge alǵashqy medıtsınalyq kómek kórsetip, oblystyq balalar aýrýhanasyna jetkizdi. Aýrýhana dárigerleri 10 jasar qyzdyń sol jaq shyntaq býynynyń jabyq jaraqaty baryn anyqtady. Mundaı jaraqat oń jambasynda da bolǵan. Dárigerlerdiń tekserýinen soń statsıonarlyq emdeý sharasy qajettigi týyndamady. Sol sebepten, jaraqat alǵan jasóspirim ambýlatorlyq em alý úshin úıine jiberildi», -dep habarlady oblystyq densaýlyq saqtaý basqarmasynyń baspasóz qyzmeti.
Eske sala ketelik, buǵan deıin Atyraýda 6 aılyq sábı mobıldi telefonnyń sım-kartasyn jutyp qoıǵanyn habarlaǵan bolatynbyz.
