Atyraýda sanıtarııalyq talaptardy saqtamaǵan naýbaıhana jumysyn toqtatty
ATYRAÝ. KAZINFORM - Atyraýda sanıtarııalyq talaptarǵa saı kelmeıtin naýbaıhana anyqtaldy. Kúnine shamamen 600 nan shyǵaratyn tseh bir aıǵa jabyldy.
Áleýmettik jelide taraǵan qaladaǵy naýbaıhanalardyń birindegi jaǵdaı kópti shoshytty. Vıdeodan nanǵa arnalǵan qalyptardyń jerde jatqanyn, ǵımarattyń jóndelmegenin, ónimderdiń durys saqtalmaǵanyn jáne aýmaqtyń sanıtarlyq talaptarǵa sáıkes kelmeıtinin baıqaýǵa bolady.
28 qańtarda Atyraý qalalyq sanıtarııalyq- epıdemıologııalyq baqylaý basqarmasy kásipkerlik sýbektige jospardan tys tekseris júrgizdi. Nátıjesinde tamaq ónimderin óndirý jónindegi obektilerge qoıylatyn sanıtarııalyq-epıdemıologııalyq talaptar, tamaq óńdeý tehnologııasy buzylǵany belgili boldy.
- Jospardan tys tekseris qorytyndysymen jeke kásipkerge QR Ákimshilik quqyq buzýshylyq týraly kodeksiniń 425 baby 1 tarmaǵyna sáıkes 160 AEK nemese 700 myń teńgege jýyq aıyppul salyndy. Buzýshylyqtardy joıýǵa bir aı ýaqyt berildi. Sondyqtan nysan óz qyzmetin toqtatty,-dedi Atyraý qalalyq sanıtarııalyq-epıdemıologııalyq baqylaý basqarmasy basshysynyń orynbasary Ernar Ábilqaıyrov.
Tekseris nátıjesinde onda jumys istegen 3 azamattyń medıtsınalyq tekseristen ótkenin rastaıtyn sanıtarlyq kitapshasynyń joqtyǵy belgili bolǵan.
- Qoldanystaǵy normatıvtik quqyqtyq aktilerge sáıkes 2018 jyldan bastap kásipkerlik sýbektilerge júktemeni azaıtý maqsatynda sanıtarııalyq e-epıdemıologııalyq aýdıt, 2020-2024 jyldar aralyǵynda ShOB nysandaryna moratorıı engizilgendikten atalǵan naýbaıhana birneshe jyldan beri josparly tekserispen qamtylmady. Sondaı-aq osy ýaqytqa deıin turǵyndardan aryz-shaǵym túspedi,-dedi Atyraý qalalyq sanıtarııalyq-epıdemıologııalyq baqylaý basqarmasy basshysynyń orynbasary Ernar Ábilqaıyrov.
Tekseris júrgizgen mamandardyń sózinshe, naýbaıhana 2008 jyldan beri jumys istep kelgen. Nysan «Atyraý» yqsham aýdanynda ornalasqan.
Osyǵan deıin Qyzylordada sanıtarııalyq talap saqtamaǵandarǵa 22 mln 800 myń teńgege jýyq aıyppul salynǵanyn jazǵan edik.