Atyraýda salynyp jatqan 2 jaıly mekteptiń qurylysynan kemshilik anyqtaldy

ATYRAÝ. KAZINFORM – Atyraý oblysynyń Qurmanǵazy aýdanynda salynyp jatqan eki jaıly mekteptiń qurylysynan kemshilik anyqtalǵan. Qurylys materıaldary keshigip, jumys kúshiniń jetispegen. 

Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń qyzmetkerleri eriktilermen birge jaıly mektepterdiń qurylysyna monıtorıng júrgizdi.

«Qurmanǵazy aýdanynyń Aqkól jáne Qurmanǵazy aýylynda árqaısysynyń quny 4,2 mlrd teńge 600 oryndyq eki mekteptiń qurylysy bastalǵan. Monıtorıng barysynda qurylys materıaldarynyń keshigýine, sondaı-aq jumys kúshiniń bolmaýyna baılanysty qurylys jumystary júrgizilmeıtini anyqtaldy. Qurmanǵazy aýyly turǵynynyń ótinishi negizinde tekserý júrgizilip, monolıtti qabyrǵalar men tirekter jazyqtyǵynyń standarttarǵa sáıkes kelmeıtini belgili boldy», - dep habarlady óńirlik departamenttiń baspasóz qyzmeti.

Moıntorıngtiń qorytyndysymen merdiger kompanııa men tehnıkalyq qadaǵalaýshy ákimshilik jaýapkershilikke tartylǵan. Olarǵa anyqtalǵan buzýshylyqtardy joıý boıynsha sharalar qabyldaý týraly nusqama berildi.

«Qazir buzýshylyqtar joıyldy. Merdiger tarapynan kóshi-qon zańnamasyn buzý faktileri anyqtaldy», - dep málim etti departamenttiń baspasóz qyzmeti.

Eske sala ketelik, budan buryn Atyraýda jolǵa tóselgen iri túıirshikti asfalt betony normaǵa sáıkes emestigin habarlaǵan edik.