Atyraýda salynǵanyna 6 jyl ǵana bolǵan úıler turýǵa jaramsyz kúıde
ATYRAÝ. KAZINFORM — Atyraý qalasynda osydan 6 jyl buryn paıdalanýǵa berilgen baspanalar turýǵa jaramsyz. 14 úıdi salǵan merdiger ózin «bankrot» dep jarııalaǵan, baspana kiltin tabystaǵan ákimdik bolsa, máseleniń sheshimin tappady.
«Nurly Jer» baǵdarlamasy arqyly salynǵan baspanalar Talqaırań-2 yqsham aýdanynda ornalasqan. Azamattar «Otbasy bankten» ıpotekaǵa alǵan. Alaıda az ýaqyt ótkennen keıin qabyrǵalary jarylyp, eden túsip ketken. Tipti, jarlary qulap, adam ómirine qaýip tóndirgen. Sondyqtan kópshilik páter jaldap júrýge májbúr.
— Úıdi salǵan merdiger mekeme «AzııaStroıServıs » kompanııasy eshteńe istemeımiz, ákimdikpen sottasyńyzdar dedi. Atyraý qalasy ákiminiń orynbasary baspanamyzdyń jaǵdaıyn kózben kórip ketti. Alaıda eshqandaı shara qabyldap jatqan joq. Bul úıde turý múmkin emes. Jóndeýge kelmeıtin kúıde tur, — dedi kópbalaly ana Móldir Yrysqalıeva.
Turǵyndardyń sózinshe, irgetasta armatýra bolmaǵan. Jyl saıyn jaryqtardy bitep, jamap-jasqaǵanymen nátıje joq. Búginde biri ıpotekadan qutylsa, ekinshileri nesıelerin ál jappaǵan.
— 14 mln 300 myńnan asa aqsha tólep, ıpotekany japtym. Maqsatym — úıdi satý. Óıtkeni, turý múmkin bolmady. «BatysAlıansStroı» kompanııasy ózderi salǵan úılerdiń ótemaqysyn bereıin dep jatyr. Al bizdiń úıdi salǵan «AzııaStroıServıs» kompanııasynyń bankrot bolǵanyna bizdiń qatysymyz joq. Úkimettiń sol mekemeni jaldap, baspana salyp bergenine biz kináli emespiz. Kiltin ákimdik berdi. Endi bizge jaǵdaı jasasyn, — dedi turǵyn Altyn Demesheva.
Kúni keshe qurylys salasyndaǵy memlekettik ǵylymı-zertteý jáne jobalaý ınstıtýtynyń qorytyndysy shyqty. Mamandar úılerdiń sapasy syn kótermeıtinin málimdegen. Jóndeýge kelgenmen, onyń shyǵyny jańa úıdiń qurylysyna kerekti qarjymen birdeı bolady.
2020 jyly «Nurly Jer» baǵdarlamasy arqyly 60 úı salynyp, turǵyndarǵa berilgen. Onyń 12-si — ekiqabatty. Al 28 úı birqabatty. Qalǵan 20 baspana eki páterden turady. Bul úılerdi 3 merdiger salǵan.
54 úıdi salǵan «BatysAlıansStroı» JShS tehnıkalyq tekseris júrgizgen. Endi bul kompanııa jaýapkershilikten qashpaı 60 jáne 120 sharshy metrli baspanalarǵa 18 jáne 30 mln teńge kóleminde ótemaqy tóleýge daıynbyz dep otyr.
Al qalǵan 14 úıdi turǵyzǵan «AzııaStroıServıs» kompanııasy eshqandaı tólem bolmaıtynyn ashyq aıtqan. Atyraý qalalyq qurylys bóliminiń ókilderi bul kompanııaǵa qatysty aldaǵy aptada jınalys ótkizip, turǵyndardyń qatysýymen máseleni sol jerde talqylamaq. Qazirgi ýaqytta ákimdik ókilderi zertteý ınstıtýtynyń 200 bettik qorytyndysyn oqyp jatyr.
— «BatysAlıansStroı» kompanııasy ózi salǵan úıdiń turǵyndarymen jeke jeke kelissózder júrgizip jatyr. Al «AzııaStroıServıs» kepildik merzimi ótkenin alǵa tartyp, jaýapkershilikten qashyp otyr. Mekeme «bankrot bolǵannan keıin eshqandaı is-áreket jasaı almaımyz» dedi. Jalpy saraptamanyń qorytyndysy boıynsha turǵyn úılerdiń irgetasyn nyǵaıtyp, kúrdeli jóndeý nemese buzý týraly sheshim shyqty. Jumys pen shyǵyn kólemi jańa úı salǵanmen teń dep kórsetti, — dep pikir bildirdi qalalyq qurylys bóliminiń basshysy Arnat Ondasynov.
Arnat Ondasynov turǵyndar ákimdikti de, merdiger mekemeni de sotqa berýge quqyly ekenin aıtty.
Osyǵan deıin Atyraýda 7 jyl buryn bastalǵan 24 turǵyn úı jobasy áli aıaqtalmaǵanyn jazǵan edik.