Atyraýda Respýblıka kúni qalaı toılandy
Atyraýda Respýblıka kúnine oraı memlekettik tý kóterildi. Munaıly shahardaǵy týtuǵyr alańynda ánuran men patrıottyq ánder shyrqaldy, dep habarlaıdy Kazinform.
Patrıottyq is-sharaǵa zııaly qaýym ókilderi, qala turǵyndary men qonaqtary, jastar ókilderi, áskerı bólim sarbazdary qatysty.
Іs-sharada oblys ákimi Serik Shápkenov jurtshylyqty merekemen quttyqtap, Táýelsizdigimizdiń tumaryna aınalǵan memlekettik rámizderimizdiń qundylyǵyna toqtaldy.
– 1990 jylǵy 25 qazanda elimizdiń memlekettik egemendigi týraly deklaratsııa qabyldandy. Bul tarıhı qujat arqyly elimizdiń tutastyǵy, jerimizdiń bólinbeıtindigi, birligimizdiń myzǵymaıtyny, Qazaqstan halqynyń mádenıetin, tilin damytý, ulttyq biregeılikti nyǵaıtý sekildi memlekettilik qaǵıdattar tuńǵysh ret jarııa etildi. Sol kúnnen bastap halqymyz ulttyń uly muraty – jańa memleket qurýǵa kiristi. Respýblıka kúniniń qaıta jańǵyrýy – Jańa Qazaqstan urpaǵynyń óziniń tarıhı bastaýy men tereń sabaqtastyǵy tamyryn tanýynyń basty nyshany. Respýblıka kúni retinde bul kúnge ulttyq mereke mártebesi berildi. Soǵan oraı búgin biz Týymyzdy kókte jelbirettik. Táýelsizdigimiz baıandy bolsyn, jurtymyz tynysh, elimizdiń mártebesi bıik bolsyn! Kók týymyzdyń astynda Ádiletti Qazaqstandy birge órkendeteıik, - dedi Serik Shápkenov.
Týtuǵyrdyń bıiktigi – 91 metr.
Alyp týdy únemi kórinip turýy úshin qolmen nemese elektr jetegimen kóteretin kópqyrly bolattan jasalǵan dóńgelek konýs tiregi bar.
Uzyndyǵy 80 metrlik týtuǵyr aınalasynda sýburqaq pen doǵa pishindi kompozıtsııa bar.
Kompozıtsııanyń orta tusynda qoladan jasalǵan Qazaqstan Respýblıkasynyń kartasy, joǵary jaǵynda Eltańba ornatylǵan.
Al, shetki bólikterine Ánuran jazylǵan.
Eske sala ketelik, budan buryn bir atyraýlyq memlekettik nagradamen marapattalǵanyn jazǵan edik.
