Atyraýda relske shyqqan jylqynyń kesirinen 2 jolaýshy, 3 júk poıyzy kidirgen

ATYRAÝ. KAZINFORM — Atyraý oblysynda teplovoz mashınısi jylqy tabynyn baspaý úshin shuǵyl tejeý tetigin basyp, poıyzdy toqtatqan.

«Qazaqstan temir joly» UK» AQ baspasóz qyzmetiniń málimetinshe, oqıǵa Qyzylqoǵa jáne Maqat aýdanynyń aralyǵynda bolǵan. 

— Atyraý oblysynyń Saǵyz — Maqat temirjol ýchaskesinde poıyz mashınısi jolǵa shyǵyp ketken jylqy tabynyn basýǵa jol bermedi. Temirjol mańynda jaıylyp júrgen jylqylar relsti kesip ótip, apatqa qaýip tóndirdi. Mashınıst uzaq dybystyq dabyl berip, shuǵyl tejeýdi qoldandy. Jol dıstantsııasynyń qyzmetkerleri tabyndy joldan qýyp jiberdi, — dep habarlady kompanııanyń baspasóz qyzmeti.

Atalǵan oqıǵanyń saldarynan 5 poıyz kidirgen. Onyń 2-eýi — jolaýshy, 3-eýi — júk poıyzy.

— Qaraýsyz júrgen mal temirjoldaǵy poıyz qozǵalysyna eleýli qaýip tóndiredi. Maldyń rels ústine shyǵýynan apatty jaǵdaı týyndaýy múmkin ekenin eskertemiz, — dep málim etti kompanııanyń baspasóz qyzmeti.

Eske sala keteıik, buǵan deıin Atyraý oblysynda lokomotıv pen 11 vagon relsten shyǵyp ketip, jumysshylar zardap shekkenin habarlaǵan edik.

Keıin Atyraý mańyndaǵy apattyń saldarynan 6 jolaýshylar poıyzy keshigetinin jazǵan bolatynbyz.