Atyraýda referendýmdy baqylaý úshin 16 qoǵamdyq uıym akkredıtteldi
ATYRAÝ. KAZINFORM — Atyraý oblysynda referendýmdy baqylaý úshin 16 qoǵamdyq uıym akkredıtteýden ótti. Bul týraly oblystyq aýmaqtyq referendým komıssııasy málim etti.
Jalpy óńirde baıqaý jumystaryn júrgizýge 17 qoǵamdyq uıym ótinim bergen. Sonyń 16-sy akkredıttelse, taǵy bir uıymnyń qujaty qaralyp jatyr. Qoldanystaǵy tártipke sáıkes, akkredıttelgen qoǵamdyq birlestikter men kommertsııalyq emes uıymdardan bir ýchaskege bir mezette bir ǵana baıqaýshy kire alady. Baıqaýshy ózimen birge jeke basyn jáne ókilettigin kýálandyratyn qujattardyń túpnusqasyn kórsetýi tıis. Sondaı-aq, ol ýchaskelik referendým komıssııasynyń jumysyna jáne daýys berýge kelgen azamattarǵa kedergi keltirmeýi qajet.
— Halyqaralyq deńgeıde jumys isteıtin baıqaýshylarǵa kelsek, qazirgi tańda Ortalyq referendým komıssııasy arqyly akkredıtteý jumysy tolyq aıaqtaldy. 38 shet memleketten jáne 11 halyqaralyq uıymnan barlyǵy 359 baıqaýshy akkredıtteýden ótti. Ázirge Atyraý oblysynda jumys jasap jatqan halyqaralyq baıqaýshylar joq. Kelgen jaǵdaıda olarǵa qajetti jaǵdaı jasalady, — dedi Atyraý oblystyq aýmaqtyq referendým komıssııasynyń tóraǵasy Ásııa Qystaýbaeva
Baıqaýshy retinde tirkelgen qoǵamdyq uıymdardyń ókilderi referendým barysynda zań buzýshylyqqa kýá bolǵan jaǵdaıda foto jáne beınetúsirilim júrgizýge quqyly. Jınalǵan dálelderdi paıdalanyp, referendým komıssııasyna nemese sotqa shaǵym túsire alady.
Atyraý oblysynda referendýmdy ótkizý úshin 276 ýchaskelik referendým komıssııasy jumys isteıdi. Barlyq komıssııa qyzmeti Ortalyq referendým komıssııasy bekitken kúntizbelik josparǵa sáıkes júrgizilip jatyr. Ýchaskelik referendým komıssııalary 22 aqpannan bastap óz jumysyna kiristi. Al 27 aqpannan bastap daýys berýge quqyǵy bar azamattar ózderiniń derekterin ýchaskelerge baryp tekserýge múmkindik aldy. Qazirgi ýaqytta Atyraý oblysy boıynsha daýys berýge quqyǵy bar azamat sany 416 myńnan asady.
15 naýryz referendým kúni azamat túrli sebeppen tirkelgen mekenjaıynan tys jerde bolatyn bolsa, aldyn ala esepten shyǵarý kýáligin alýǵa quqyly. 27 aqpanda bastalǵan bul jumys 14 naýryz saǵat 18:00–ge deıin jalǵasady. Óz ýchaskeńizge baryp, ýchaskelik komıssııaǵa jazbasha ótinish jazyp, jeke basyńyzdy kýálandyratyn qujatty usynýyńyz qajet. Qujatty senimhat negizinde jaqyndaryńyz arqyly da alýǵa bolady. Ol úshin notarıattyq kýálandyrý talap etilmeıdi, ıaǵnı qaǵazǵa qolmen jazyp berseńiz jetkilikti.
— Bir eldimeken shegindegi basqa ýchaskede daýys bergisi keletin azamattarǵa esepten shyǵarý kýáligi berilmeıdi. Daýys berýge quqyǵy bar azamattar óz ýchaskeleri týraly málimetti Telegramda ashylǵan «AtyrauReferendumBot» akkaýnty, sondaı-aq oblys ákimdiginiń atyrau.gov.kz. resmı saıtynyń «Saılaý» paraqshasyndaǵy «REFERENDÝM — 2026» bólimindegi «Ózińdi daýys berýshi azamattar tiziminen tekser!» siltemesine ótip, JSN-di terip suraý salýǵa múmkindik bar, — dep málimdedi Atyraý oblystyq aýmaqtyq referendým komıssııasy.
Sonymen qatar 109 birińǵaı baılanys ortalyǵyna habarlasýǵa bolady. 22 aqpannan bastap óńirde 276 ýchaskelik referendým komıssııasy jumys istep tur. Al oblysta 416 myńnan astam azamat daýys berý quqyǵyna ıe.
Atyraýda referendým jáne áz-Naýryz kúni qoǵamdyq kólikter jolaýshylardy tegin tasymaldaıdy.