Atyraýda referendým jáne áz-Naýryz kúni qoǵamdyq kólikter jolaýshylardy tegin tasymaldaıdy
ATYRAÝ. KAZINFORM — Atyraý qalasy ákimdiginiń baspasóz qyzmeti 15 jáne 22 naýryz kúni qoǵamdyq kólikter qala turǵyndary men qonaqtaryn tegin tasymaldaıtynyn málimdedi.
Bul sheshim turǵyndardyń saılaý ýchaskelerine kedergisiz barýyna, sondaı-aq qala ishinde erkin qozǵalýyna qolaıly jaǵdaı jasaý úshin qabyldanǵan.
— Atalǵan kúni qala aýmaǵynda qatynaıtyn avtobýstar ádettegi keste boıynsha jumys isteıdi. Turǵyndar men qala qonaqtary qoǵamdyq kólikterdi aqysyz paıdalana alady, — dep málimdedi qala bıligi.
Oblystyq mádenıet jáne tilderdi damytý basqarmasy bergen málimetke súıensek, merekelik dýman legi 14 naýryz — Kórisý kúninen bastalady. Bul kúni qaladaǵy iri saýda ortalyqtarynda kontsert uıymdastyrylady.
Sondaı-aq H.Dospanova atyndaǵy Atyraý halyqaralyq áýejaıynda jolaýshylar úshin arnaıy kórisý rásimi ótkiziledi. 15 naýryz kúni saǵat 11:00–de «Isataı-Mahambet» alańynda «Dástúr dánekeri — Amal merekesi» atty mádenı-kópshilik shara, al 16 naýryzda ulttyq naqyshtaǵy sýretter kórmesi, qala mektepteri arasynda «Dástúrden taǵylym» taqyrybynda ULTTYQ QUIZ zııatkerlik oıyny ótedi.
Budan bólek, sol kúni saǵat 15:00–de Saltanat saraıynda qazaqtyń salt-dástúrlerinen kórinis, qolóner buıymdary men ulttyq kıimder defılesi jáne Atyrau Hub ǵımaratynda startaptar baıqaýy uıymdastyrylmaq.
— 17 naýryz kúni mereke jalǵasyp, kópbalaly analarǵa «Altyn alqa» jáne «Kúmis alqa» memlekettik nagradalaryn jáne turǵyn úı kezeginde turǵan otbasylarǵa páter kiltin tabystaý rásimi josparlanǵan. Oǵan qosa «Berekeli shańyraq» ónerli otbasylarynyń festıvali ótedi. Al 18 naýryz saǵat 15:00–de «Ulttyq kıim — rýhanı mura» atty ulttyq kıim sherýi ótedi. Sherý «Sultan-Beıbarys» alańynan bastalyp, «Isataı-Mahambet» alańyna deıin jalǵasady. Sherý estarada ánshileri qatysatyn kontsertke ulasady. Al 19 naýryzda AI Hakaton uıymdastyrylady. 20 naýryz kúni «Isataı-Mahambet» alańynda ulttyq sport túrlerinen jarystar ótkizý josparlanyp otyr, — delingen Naýryznama onkúndiginiń aıasyndaǵy negizgi is-sharalar tiziminde.
21 naýryzda Qazaqstan halqy Assambleıasynyń qatysýymen mádenı-kópshilik shara ótpek. Al 22 naýryz — Naýryz merekesiniń negizgi kúni saǵat 11:00–de Isataı-Mahambet alańynda «Qosh keldiń, Áz Naýryz!» atty mádenı is-shara, keshki 20:00–de estrada juldyzdarynyń qatysýymen kontsert ótedi.
Naýryznama onkúndigi 23 naýryz kúni «Taza tabıǵat» jalpyulttyq aktsııasymen qorytyndylanady. Bul kúni qala aýmaǵynda senbilik ótkizilip, eldi mekender men aýlalarda tazalyq jumystary júrgiziledi.
Buǵan deıin qyzylordalyqtar referendým kúni qoǵamdyq kólikte tegin júretinin jazǵan edik.
