Atyraýda referendým qarsańynda úshem týǵan analar tańdaý jasady
ATYRAÝ. KAZINFORM – Referendým qarsańynda Atyraý oblystyq perınataldyq ortalyǵynda eki birdeı úshem dúnıege keldi. Qýanyshty jańalyq perzenthana ujymy men jas analardyń jaqyndary úshin erekshe sátke aınaldy.
Perınataldyq ortalyqta ornalasqan №22 jabyq referendým ýchaskesinde úshemderdiń analary da daýys berip, óz tańdaýyn jasady. Solardyń biri – úshemniń anasy Gúlshat Ahanova.
Atyraý qalasyna qarasty Aqjar aýylynyń turǵyny Gúlshat Ahanovanyń otbasynda buǵan deıin úsh qyzy bolǵan. Úshem qyzdardyń dúnıege kelýimen olardyń shańyraǵynda alty qyz bala ósetin boldy. Sábılerge Nurılıa, Sabıra jáne Hadııa degen esim berilmek.
– Elimizdiń bolashaǵy úshin, qyzdarymyzdyń bolashaǵy úshin búgin daýys berdim, – deıdi jas ana.
Referendým qarsańynda dúnıege kelgen taǵy bir úshemniń anasy – Aıdana Erǵalıeva. Onyń otbasynda úsh ul ómirge keldi.
Dárigerlerdiń aıtýynsha, analar men nárestelerdiń jaǵdaıy qanaǵattanarlyq, tıisti medıtsınalyq baqylaýda.
Qýanyshty oqıǵa perınataldyq ortalyq ujymy úshin de este qalarlyq sát boldy. Referendým qarsańynda dúnıege kelgen alty sábıdiń ómirge kelýi jańa ómirdiń bastaýyndaı jarqyn belgi retinde qabyldandy.
Buǵan deıin Teńiz ken ornynda jumys isteıtinder daýys berip jatqanyn jazǵan edik.