Atyraýda Rahymjan Otarbaev atyndaǵy ІІІ halyqaralyq teatr festıvali bastaldy
ATYRAÝ. KAZINFORM – Atyraýda Rahymjan Otarbaev atyndaǵy ІІІ halyqaralyq teatr festıvali saltanatty túrde ashyldy.
Oǵan Qazaqstannyń, Qyrǵyzstan men Qaraqalpaqstannyń 11 teatry qatysady. Sahna sańlaqtary bes kún boıy qazaqtyń kórnekti jazýshy-dramatýrgynyń shyǵarmashylyq murasyn pash etetin qoıylymdardy kórermen nazaryna usynbaq.
Saltanatty rásim Mahambet atyndaǵy Akademııalyq qazaq drama teatrynda ótti. Teatr toıyna Atyraý oblysynyń ákimi Bolat Aqsholaqov, TÚRKSOI Halyqaralyq túrki mádenıeti uıymynyń bas hatshysy Sultan Raev, QR Mádenıet jáne aqparat mınıstrligi Teatr óneri basqarmasynyń basshysy Altyngúl Nurbekova, Rahymjan Otarbaev atyndaǵy «Rýhanııat» qorynyń tóraıymy, dramatýrgtiń jary Sáýle Otarbaeva qatysty.
Festıvaldiń qurmetti qonaqtary sapynda belgili teatr jáne kıno qaıratkerleri, Qazaqstannyń halyq ártisi Merýert Ótekesheva, Qazaqstannyń halyq ártisi Baqtııar Qoja, Qazaqstan Respýblıkasynyń eńbek sińirgen qaıratkerleri Erkebulan Daıyrov, Nurnııaz Muqanov jáne Ashat Maemırov, Qazaqstannyń halyq ártisi Dýlyǵa Aqmolda, rejısser, Qazaqstan Respýblıkasynyń eńbek sińirgen qaıratkeri, «Qurmet» ordeniniń kavaleri Nurlan Jumanııazov, Qyrǵyzstannyń eńbek sińirgen ártisi — akter ári rejısser Býsýrman Odýrakaevtar bar.
Saltanatty rásimde oblys ákimi Bolat Aqsholaqov sóz sóılep, Rahymjan Otarbaevtyń murasy qazaq ádebıeti men dramatýrgııasynda aıryqsha oryn alatynyn atap ótti.
— Rahymjan Otarbaev — Atyraý topyraǵynan túlep ushqan qalamger ǵana emes, qazaq ádebıeti men dramatýrgııasynda ózindik qoltańbasyn qaldyrǵan, barsha qazaqqa ortaq sýretker. Qalamger atyndaǵy halyqaralyq festıvaldiń týǵan jerinde ótýiniń máni erekshe. Atyraýdyń teatr ónerinde qalyptasqan ózindik dástúri bar. Bul óńirde sahna ónerine qurmet te, talǵampaz kórermen de bar. Óıtkeni teatrdyń damýy — bir ǵana óner salasynyń jetistigi emes, qoǵamnyń mádenı deńgeıiniń de kórsetkishi.
Óneri órkendegen ortada oı erkindigi, rýhanı izdenis pen shyǵarmashylyqqa degen qurmet ornyǵady.
Búgingi festıval osy dástúrdi jalǵastyryp, Atyraýdyń mádenı keńistigin jańa shyǵarmashylyq baılanystarmen tolyqtyrady dep senemin, — dedi óńir basshysy.
Festıvaldiń basty maqsaty — Rahymjan Otarbaevtyń shyǵarmashylyq murasyn dáripteý, ulttyq teatr ónerin damytý jáne halyqaralyq mádenı yntymaqtastyqty nyǵaıtý. Mahambet atyndaǵy Akademııalyq qazaq drama teatrynyń bas sýretshisi Temirbek Muhtarovtyń aıtýynsha, festıval rejısserler men akterlerge, sýretshiler men shyǵarmashylyq ıntellıgentsııa ókilderine kásibı dıalog ornatýǵa múmkindik beretin alań bolmaq. Qatysýshylar bir-birimen tájirıbe almasyp, ózderiniń sahnalyq sheshimin usynyp, kórermendi dramatýrgtiń shyǵarmalaryndaǵy paıymdarmen tanystyrady.
Festıval aıasyndaǵy spektaklder 12-16 qazan aralyǵynda Mahambet atyndaǵy teatrda jáne Atyraý jastar teatrynda ótedi. Qoıylymdardy otandyq jáne sheteldik teatr óneriniń mamandarynan quralǵan kásibı qazylar alqasy baǵalap, úzdik shyǵarmashylyq jumystardy anyqtaıdy.
