Atyraýda iri kásiporyndarǵa 2,3 mlrd teńgeden astam aıyppul salyndy

ATYRAÝ. KAZINFORM — Óńirde ekologııalyq zańnamany buzý derekteri boıynsha birqatar iri kásiporynǵa 2,3 mlrd teńgeden astam aıyppul salyndy. Bul týraly Atyraý oblysynyń Tabıǵı resýrstar jáne tabıǵat paıdalanýdy retteý basqarmasy Kazinform agenttiginiń saýalyna bergen jaýabynda habarlady.

Basqarma málimetinshe, 2025 jyldyń qańtar–tamyz aılarynda óńirde ekologııalyq zańnamanyń saqtalýyna baılanysty 21 baqylaý júrgizilgen. Onyń ishinde 7 profılaktıkalyq baqylaý, 13 jospardan tys tekseris jáne 1 sáıkestikke tekseris bar.

— Baqylaý nátıjesinde 52 buzýshylyq anyqtaldy. 19 nusqama berilip, barlyǵy oryndaldy. Jalpy somasy 2 mlrd 360 mln teńgeden astam aıyppul salynyp, 121 ákimshilik is qozǵaldy, — dedi basqarmadan.

Basqarma ókilderiniń aıtýynsha, óńirdegi birqatar iri kásiporyn qorshaǵan ortaǵa keri áserin tıgizip otyrǵany anyqtalǵan.

— «ANACO» JShS ekologııalyq ruqsatsyz shyǵaryndylary úshin 897 mln teńge kóleminde aıyppulǵa tartyldy. Kompanııa sotqa shaǵymdanǵanymen, sot sheshimimen aıyppul kúshi saqtalyp, óndirildi, — dep naqtylady vedomstvodan.

Sondaı-aq «Atyraý munaı óńdeý zaýyty» JShS lastaýshy zattardyń shyǵaryndylaryn normatıvten asyrǵany úshin 28 mln teńge, al «Potentsıal Oıl» JShS — 7,2 mln teńge, «Petrocraft» JShS — 1,25 mlrd teńge kóleminde aıyppul tóleıdi.

— Barlyq zańbuzýshylyq boıynsha kináli tulǵalar ákimshilik jaýapkershilikke tartyldy. Keıbir is boıynsha aıyppul óndiris satysynda. Ekologııalyq baqylaý men monıtorıng jumystary turaqty túrde jalǵasady, — dep atap ótti Tabıǵı resýrstar jáne tabıǵat paıdalanýdy retteý basqarmasynyń ókilderi.

Buǵan deıin Atyraý ekologııasyna áser etetin negizgi nysandar belgili bolǵanyn jazǵanbyz.