Atyraý turǵyndaryn mal ólimi alańdatyp otyr
ATYRAÝ. KAZINFORM – Qazirgi kezde patologııalyq úlgi men Jem ózeninen synama alyndy.
Oqıǵa Atyraý oblysy Jylyoı aýdanynda tirkeldi. Mal ótken aptanyń sońynda belgisiz jaǵdaıda qyryla bastaǵan.
- Mal ólimi ótken aptanyń juma-jeksenbi kúnderi tirkelgen. Veterınar mamandar baryp, tekserip qarady. Mal óleksesinen patologııalyq úlgi alynyp, oblystyq zerthanaǵa jiberildi. Sý synamasy da alynyp, zerthanaǵa berildi. Naqtysy zerthana qorytyndysynan soń anyqtalady. Bastysy – juqpaly aýrýlary joq, - dedi Jylyoı aýdandyq veterınarııa stansasynyń basshysy Nurbolat Órbisinov.
Qazirgi kezde mal ýlandy degen boljam bar.
- Qaraý kezinde 1 túıe, 4 sıyr malynyń ólgeni anyqtaldy. Ólgen maldarda juqpaly aýrýlardyń klınıkalyq belgileri baıqalmaǵan. Ólgen bir sıyr malyna jaryp soıý júrgizip, ishki organdary búlingeni baıqalǵan. Aldyn ala dıagnozy – ýlaný, - dep habarlady Atyraý oblysy ákiminiń baspasóz qyzmeti.
Eske salsaq, bıyl shilde aıynda Qaraǵandy oblysynyń Shahtınsk qalasyna qarasty Dolınka kentinde 100-den astam qoıdyń qyrylǵan. Ol kezde de mal ýlanǵan bolýy múmkin ekeni aıtyldy.