Atyraýda psıhıkalyq densaýlyǵyna baılanysty esepke alynǵandar sany artqan
ATYRAÝ. KAZINFORM — Atyraý oblysynda psıhıkalyq densaýlyǵyna baılanysty esepke alynǵandar sany ósip keledi. Qazir óńirde 6 856 adam mamandardyń baqylaýynda tur.
Atyraý oblystyq psıhıkalyq densaýlyq ortalyǵynyń málimetinshe, óńirde sońǵy jyldary psıhıkalyq densaýlyqqa baılanysty alǵash ret tirkelgender sany artqan. Naqtyraq aıtqanda, 2024 jyly 506 azamat alǵash ret esepke qoıylsa, 2025 jyly bul kórsetkish 657 adamǵa jetken. Al bıyl segiz aıda psıhıkalyq densaýlyǵyna baılanysty alǵash ret tirkelgender sany 540 adamdy quraǵan.
Mamandardyń aıtýynsha, kórsetkishtiń ósýine birneshe faktor áser etedi. Onyń ishinde psıhıkalyq densaýlyq máselelerin erte anyqtaý, medıtsınalyq qyzmettiń qoljetimdiligi jáne halyqtyń bul baǵyttaǵy saýatynyń artýy bar.
Atyraý oblystyq psıhıkalyq densaýlyq ortalyǵy dırektorynyń orynbasary Damır Qojantaevtyń sózinshe, balalar arasynda psıhıkalyq jáne psıhologııalyq damý buzylystaryn, sonyń ishinde aýtızm spektri buzylystaryn erte anyqtaý kórsetkishi ósip keledi.
— Balalardyń arasynda psıhologııalyq damý buzylystaryn, onyń ishinde aýtızm spektriniń buzylystaryn erte anyqtaý kórsetkishiniń ósýi baıqalady. Buǵan erte dıagnostıkanyń jaqsarýy, sondaı-aq ata-analardyń medıtsınalyq kómekke júginýiniń artýy áser etedi, — dedi Damır Qojantaev.
Onyń aıtýynsha, mamandardyń dınamıkalyq baqylaýynda ıntellektýaldyq damý buzylystary, shızofrenııa, psıhologııalyq damý buzylystary, aýtızm spektriniń buzylystary jáne organıkalyq psıhıkalyq buzylystar sııaqty jaǵdaılar kezdesedi.
Jalpy qazir aımaqta psıhıkalyq densaýlyǵyna baılanysty mamandardyń baqylaýynda 6 856 adam tur. Olardyń 100-ge jýyǵy psıhıkalyq densaýlyq saqtaý ortalyǵynan em alady.
Buǵan deıin Atyraýdaǵy apatty jaǵdaıda turǵan psıhdıspanser jalǵa alýǵa ǵımarat izdep jatqanyn jazǵan edik. Búginde mekeme qaýipsiz jaǵdaıda jumys isteýge múmkindik beretin nysanda jumysyn jalǵastyrýda.
