Atyraýda Prezıdenttiń atynan memlekettik marapattar tabystaldy
ATYRAÝ. KAZINFORM — Ulttyq mereke — Respýblıka kúni qarsańynda Atyraý oblysynyń ákimi Bolat Aqsholaqov elimizdiń jáne óńirdiń damýyna úles qosqan birqatar azamatqa Prezıdent Qasym-Jomart Toqaevtyń atynan memlekettik marapattar tabys etti.
Aımaq basshysy Respýblıka kúniniń tarıhı mańyzyna toqtalyp, bul merekeniń halyqtyń birligi men jasampazdyqqa degen umtylysyn sıpattaıtynyn aıtty.
— 25 qazan — eldigimizdiń aq joly aıqyndalǵan tarıhı kún. Búginde Qazaqstan ekonomıkalyq áleýeti zor, álemdik qaýymdastyqta óz orny bar, bolashaǵyna senimmen qaraıtyn memleketke aınaldy. Atyraý oblysy úshin ekonomıkany ártaraptandyrý, óndiristi damytý, ınvestıtsııa tartý jáne halyqtyń ómir sapasyn arttyrý mańyzdy basymdyqtar sanatynda. Al bizdiń baǵa jetpes qundylyǵymyz — beıbitshilik pen tatýlyq. Ár azamattyń adal eńbegi — elimizdiń aldaǵy damýynyń kepili. Birligimiz bizdi jańa jetistikterge bastasyn! Elimizdiń erteńi eńseli, keleshegi kemel bolsyn! — dedi Bolat Aqsholaqov.
Qazaqstan Respýblıkasy Prezıdentiniń Jarlyǵymen eńbek ardagerleri, ónerkásip, energetıka, munaı-gaz salasy, kólik, aýyl sharýashylyǵy, bilim, ǵylym, mádenıet jáne densaýlyq saqtaý ókilderi, kásipkerler men qoǵam qaıratkerleri memlekettik nagradalarmen marapattalyp, saltanatty is-shara merekelik kontsertpen aıaqtaldy.
