Atyraýda «prank» úshin qyzdy kúshtep kólikke otyrǵyzǵan úsh azamatqa aıyppul salyndy

ATYRAÝ. KAZINFORM — Atyraý qalasynyń ákimshilik quqyq buzýshylyqtar jónindegi mamandandyrylǵan soty usaq buzaqylyq jasaǵan úsh azamatqa qatysty isti qarady.

Sot materıaldaryna sáıkes, aıyptaýshylar bıyl 14 qazanda saǵat 15:10 shamasynda Atyraý qalasyndaǵy bir kafeniń aldynda, qoǵamdyq orynda, «prank» beınejazbasyn túsirý maqsatynda qyzdy aıqaı-shýmen kúshtep kólikke otyrǵyzǵan. Bul áreket arqyly olar qoǵamdyq tártipti buzyp, aınaladaǵylarǵa syılamaýshylyq tanytqan.

— Olardyń kinási beınejazba jáne basqa da dáleldemelermen tolyq dáleldendi, — delingen sottyń qaýlysynda.

Ákimshilik quqyq buzýshylyq týraly kodekstiń 434-babynyń 1-bóligine sáıkes, mundaı áreket úshin 20 aılyq eseptik kórsetkish mólsherinde aıyppul salý, 20-dan 60 saǵatqa deıin qoǵamdyq jumystarǵa tartý nemese 5-ten 10 táýlikke deıin ákimshilik qamaqqa alý túrindegi jaza kózdelgen.

Sot qaýlysymen azamattar kináli dep tanylyp, árqaısysyna 78 640 teńge kóleminde aıyppul salyndy.

— Sot qaýlylary áli zańdy kúshine engen joq, — dep atap ótti sottyń baspasóz qyzmeti.

Eske sala keteıik, 16 qyrkúıekten bastap Qazaqstanda nekege májbúrlegeni úshin qylmystyq jaýapkershilik engizilgen.

Buǵan deıin Bloger Janabylovtarǵa qatysty qylmystyq is qozǵalǵanyn jazǵanbyz.

Sonymen qatar Qarjylyq monıtorıng agenttigi qazaqstandyq bloger Nurtaza Nurbekke qatysty materıaldardy qarjylyq mán-jaılardy anyqtaý úshin ýákiletti organǵa joldaǵan edi.