Atyraýda polıtsııa qyzmetkerlerin urǵandarǵa qatysty qylmystyq is qozǵaldy

ATYRAÝ.KAZINFORM - Atyraý oblysy Maqat aýdanynda bir top azamat polıtsııa qyzmetkerlerine qarsylyq tanytyp, kúsh qoldanǵan.

Oqıǵa 3 sáýir kúni shamamen saǵat 22:00-de bolǵan. Maqat aýdanynda polıtsııa qyzmetkerleri qyzmettik mindetterin atqarý barysynda quqyqqa qaıshy árekettiń jolyn kesken. Tekserý barysynda bir top azamattyń qarsylyq tanytqany anyqtaldy. Oqıǵa saldarynan eki polıtsııa qyzmetkeri zardap shekti.

- Oqıǵaǵa qatysýshylardyń barlyǵy anyqtalyp, olarǵa qatysty protsessýaldyq sharalar qabyldandy. Bılik ókilderine qatysty kúsh qoldaný faktisi boıynsha «bılik ókiline qatysty qorqytý nemese kúsh qoldaný» babymen qylmystyq is tirkeldi. Qazirgi ýaqytta sotqa deıingi tergeý amaldary júrgizilýde,- dep málimdedi oblystyq PD baspasóz qyzmeti.

Departament polıtsııa qyzmetkerlerine qatysty kez kelgen zańǵa qaıshy áreketter zańdy óreskel buzý ekenin jáne zańnamaǵa sáıkes jaýapkershilikke ákep soǵatynyn eske saldy.

Buǵan deıin Qaraǵandy qalasynda úsh kólik soqtyǵysyp, jol-kólik oqıǵasynan zardap shekken 5 adam aýrýhanaǵa jetkizilgenin jazǵan edik.