Atyraýda polıtseıden eskertý alǵan júrgizýshi 3 jolaýshymen birge jol apatynan kóz jumdy
ATYRAÝ. KAZINFORM – Atyraý-Oral trassasynda jeńil kólik jol apatynan órtenip ketti. Kólik júrgizýshisi men 3 jolaýshy mert boldy.
Atyraý oblystyq Golıtsııa departamentiniń baspasóz qyzmetinen málim etkendeı, jol-kólik oqıǵasy búgin, 26 qazanda tańǵy saǵat 06:00 shamasynda bolǵan.
«Patrýldik polıtsııa rotasynyń qyzmetkerleri saǵat tańǵy 04:00 shamasynda Atyraý-Oral baǵytyndaǵy jolda Daewoo Nexia avtokóligin toqtatyp, júrgizýshige jolda júrý erejesiniń talaptaryn buzǵany úshin hattama toltyrdy. Kóliktiń Reseı Federatsııasynda tirkelgeni anyqtaldy. Júrgizýshige túngi mezgilde saqtyq sharalaryna muqııat bolý jóninde eskertý berdi. Alaıda, tańǵy saǵat 06:00 shamasynda Daewoo Nexia avtokóliginiń júrgizýshisi rýlge ıe bola almaı, qarama-qarsy baǵytta kele jatqan júk kóligimen soqtyǵysty. Jol apatynyń saldarynan Daewoo Nexia kóliginiń júrgizýshisi men 3 jolaýshy oqıǵa ornynda kóz jumdy. Jeńil kólik órtenip ketti», - dep habarlady patrýldik polıtsııa rotasynyń komandıri Ádilbek Shahmetov.
Onyń aıtýyna qaraǵanda, ataǵalǵan jol-kólik oqıǵasyna baılanysty qylmystyq is tirkelgen. Qazir keshendi tergeý amaldary júrgizilip jatyr.
«Júrgizýshilerge óziniń jáne jolaýshylardyń ómirine, densaýlyǵyna qaýip tóndirmeý úshin túngi mezgilde alys saparǵa shyqpaýdy eskertemiz. Jol erejesin qatań saqtaý qajet», - dep málim etti Ádilbek Shahmetov.
Eske sala ketelik, buǵan deıin Atyraýda jasóspirimdi kóligimen qaǵyp, ólimine sebepker bolǵan polıtseı sottalǵanyn habarlaǵan bolatynbyz.
