Atyraýda polıetılen shyǵaratyn alǵashqy zaýyttyń qurylysy bastaldy
ATYRAÝ. KAZINFORM – Búgin Atyraý oblysynda polıetılen shyǵaratyn zaýyttyń qurylysy bastaldy. Bul – elimizde osyndaı ónim shyǵaratyn alǵashqy óndiris orny.
Atyraý oblysyndaǵy «Ulttyq ındýstrııalyq munaı-hımııa tehnoparki» arnaıy ekonomıkalyq aımaǵynda polıetılen óndiretin zaýyttyń qurylys jumystary bastaldy. Jobaǵa tartylǵan ınvestıtsııa kólemi shamamen 7,4 mlrd AQSh dollary. Zaýyttyń qýaty – jylyna 1,25 mln tonna polıetılen.
Atyraý oblysynyń ákimi Serik Shápkenovtiń aıtýynsha, bul joba Memleket basshysy Qasym-Jomart Toqaevtyń elimizdiń batysynda munaı-gaz-hımııa ónerkásibi klasterin damytý jónindegi tapsyrmasymen qolǵa alynǵan. Jańa zaýyt Qazaqstannyń óńdeý ónerkásibindegi eń aýqymdy jobaǵa aınalady.
Qurylys jumystaryn 2029 jyly aıaqtaý josparlanǵan. Bul joba el ekonomıkasyna qalaı yqpal etedi?
Mamandardyń túsindirýinshe, birinshiden, zaýyt qurylysyna 8 myńǵa jýyq adam tartylady. Ekinshiden, iske qosylǵan kezde 800 turaqty jumys orny ashylady. Úshinshiden, ımporttalatyn polıetılen kólemin otandyq ónimmen almastyrýǵa, qosylǵan quny joǵary ónim eksportyn ulǵaıtýǵa jol ashady. Tórtinshiden, bul joba ishki jalpy ónim kórsetkishiniń 1,2 paıyzǵa ósýine múmkindik beredi. Besinshiden, uqsas salalar men eldegi jańa ónim shyǵaratyn óndiristerdiń damýyna yqpal etedi.
Al polıetılen qandaı ónim? Bul – álemde eń kóp suranysqa ıe plastık. Mundaı ónim ekonomıkanyń barlyq salasynda keńinen qoldanylady. Máselen, kúndelikti turmysta jáne ónerkásipte keńinen paıdalanylatyn qubyrlar, qurylys ındýstrııasyndaǵy jáne oraýǵa arnalǵan materıaldar, avtobólshekter, medıtsınalyq jabdyqtar men basqa da taýarlardyń quramynda polıetılen bar.
Josparǵa sáıkes bul zaýytta polıetılenniń 22 markasyn shyǵarý kózdelgen. Osyndaı ónimniń 40 paıyzy joǵary sapaly premıým sanatyna jatady. Buǵan Axens (Frantsııa), Univation Technologies (AQSh) jáne Chevron Phillips Chemical (AQSh) kompanııalarymen jasalǵan lıtsenzııalyq kelisimderdiń nátıjesinde qol jetkizilgen.
Polıetılen neden óndiriledi? Mamandardyń aıtýyna qaraǵanda, bul ónimdi óndirý úshin shıkizat retinde etan qoldanylady. Al, etan «Teńiz» ken ornynan alynatyn qurǵaq gazdan bólinedi.
Eske sala ketelik, buǵan deıin Atyraýda júk vagondaryn shyǵaratyn zaýyt iske qosylǵanyn habarlaǵan bolatynbyz.
