Atyraýda plastık qaldyqtardy qaıta óńdeıtin zaýyt ashylady
ASTANA. KAZINFORM — Búgin — Halyqaralyq klımat kúni. Ǵalymdar Jer sharynyń jylynýy men tabıǵı apattardyń jıileýine plastık qaldyqtarynyń qorshaǵan ortaǵa tıgizer zardaby tikeleı áser etedi dep dabyl qaǵady. Dál osy ekologııalyq máseleni sheshýdi kózdegen joba Atyraý oblysynda júzege asyrylyp jatyr. Bul zaýyttyń jańashyldyǵy men ekologııaǵa áseri jaıly Jibek Joly telearnasynyń «Búgin.LIVE» baǵdarlamasynda zaýyt dırektory Azamat Asylbekov baıandap berdi.
Maýsym aıynda resmı ashylatyn «Fıbroteks» zaýyty jylyna 6 myń tonna plastık bótelkeni qaıta óńdep, elimizde buryn-sońdy óndirilmegen polıefırli shtapeldi talshyq shyǵarmaq.
Zaýyt basshysynyń aıtýynsha, Qazaqstanda jyl saıyn 100 myń tonnaǵa jýyq plastık bótelke qoqysqa tastalady. Atyraýdaǵy jańa zaýyt osy qaldyqtardy kádege jaratyp, odan qundy ónerkásiptik ónim alýdy maqsat etip otyr.
— «Fıbroteks» jobasy — Qazaqstandaǵy biregeı bastama. Biz jylyna 6 myń tonna plastıkalyq bótelkeni qaıta óńdeımiz. Bul tek ekologııalyq tazalyq emes, basqa óndirister úshin qundy shıkizat kózi. Shtapeldi talshyq osy ýaqytqa deıin elimizde óndirilmegendikten, biz ony Reseı, Ózbekstan jáne Túrikmenstannan ımporttaýǵa májbúr boldyq. Endi bul olqylyqtyń orny toldy, — deıdi Azamat Asylbekov.
Zaýytty jasaqtaý kezinde álemdik tájirıbe eskerilip, Eýropalyq tehnologııa negizindegi eń ozyq qondyrǵylar tańdap alynǵan.
— Bizdiń óndiriste JI júıesimen jumys isteıtin fotoseparator ornatylǵan. Ol bótelkelerdi tústeri boıynsha avtomatty túrde ajyratady. Sonymen qatar japsyrmalardy qolmen emes, arnaıy bólgish qural arqyly ózdiginen julatyn júıe bar. Al basty ereksheligimiz — sýdy únemdeý. Tehnologııalyq jetistikterdiń arqasynda biz sýdy 95% únemdep, ony qaıta paıdalaný tsıklin jolǵa qoıdyq, — dep atap ótti kásiporyn basshysy.
Zaýyttan shyqqan shtapeldi talshyq eń aldymen Ortalyq Azııadaǵy eń iri geotekstıl zaýyty — «Intago Qazaqstan» zaýytynyń qajettiligin óteıdi. Buryn bul kásiporyn shıkizatty shetelden alyp, jyl saıyn mıllıondaǵan dollar qarajat syrtqa jumsalǵan edi.
— Shtapeldi talshyqtyń qoldaný aıasy óte keń. Ol tek geotekstıl úshin emes, kıim óndirisinde jylytqysh retinde, jıhaz ónerkásibinde jáne oıynshyqtardyń ishin toltyrýǵa paıdalanylady. Biz osy ónimdi óndirý arqyly Qazaqstandaǵy jeńil ónerkásip pen qurylys salasyna serpin beremiz, — deıdi Azamat Asylbekov.
Aıta keteıik, buǵan deıin, Qazaqstanda qýaty jylyna 1 mln tonna bolatyn metallýrgııalyq koks óndiretin jańa óndiris iske qosylatynyn habarlaǵan edik.
