Atyraýda páterdegi órttiń tútininen ýlanǵan zeınetker kóz jumdy

ATYRAÝ. KAZINFORM – Atyraý qalasynda 2 qabatty turǵyn úıdegi páter órtendi. Tútinnen ýlanǵan zeınetker oqıǵa ornynda qaıtys boldy.

Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynan málim etkendeı, órt búgin, 5 naýryzda bolǵan.

– Qutqarý qyzmetiniń baılanys beketine tańerteńgi saǵat 07:32-de Atyraý qalasyndaǵy M.Áýezov kóshesinde ornalasqan turǵyn úıden tútin shyqqany týraly shaqyrtý tústi. Órt sóndirý qyzmetiniń qutqarýshylary sanaýly mınýtta shaqyrtý ornyna jetip, 1-qabattaǵy páterdiń órttengenin anyqtady. Páter esigi qulyptaýly bolǵandyqtan, qutqarýshylar terezeden kirip, barlaý jumysyn júrgizdi. Nátıjesinde páterdiń qonaq bólmesinen 1952 jylǵy zeınetker áıeldi taýyp, taza aýaǵa shyǵardy. Apattar medıtsınasy ortalyǵynyń dárigerleri áıeldiń tútin ıisinen ýlanyp, qaıtys bolǵanyn tirkedi, - dep málim etti ımıdjdik jumys jáne syrtqy kommýnıkatsııalar toby.

Páterdegi órt saǵat 07:58-de tolyq sóndirildi. Jalyndy sóndirýge tótenshe jaǵdaılar departamentinen 6 qyzmetker, 2 tehnıka jumyldyryldy.

Eske sala ketelik, buǵan deıin Atyraý oblysynda úı aralap júrgen ýchaskelik polıtseı 70 jastaǵy qarııany órtten alyp shyqqanyn jazǵan bolatynbyz.