Atyraýda páter jaldaǵan aǵaıyndylar 1 keliden astam esirtkini zańsyz saqtaǵan

ATYRAÝ. KAZINFORM – Atyraýda aǵaly-inili jigitter páterdi jalǵa alyp, 1 keliden astam esirtkini zańsyz saqtap kelgen.

Atyraý oblystyq polıtsııa departamentiniń baspasóz qyzmetinen málim etkendeı, páter ıesinen shaǵym túsken. 

– Jalǵa alýshylar páteraqyny ýaqytynda tólemegen. Páter ıesine esik ashpǵan. Bul páter ıesiniń polıtsııaǵa shaǵym túsirýine sebep boldy. Mán-jaıdy anyqtaý úshin páterge kelgen ýchaskelik polıtsııa ınspektorlary kúdikti áreketterdi baıqaǵan. Páterdegi eki er adamnyń biri kerýerttiń astyna zat jasyrǵan. Al ekinshisi terezeden zat laqtyryp, kúdik týdyrǵan. Tekserý nátıjesinde kerýert astynan 4 zıp-paketke oralǵan sıntetıkalyq esirtki tabyldy, -dep departamenttiń baspasóz qyzmeti. 

Oqıǵa ornyna jedel-tergeý toby men esirtki qylmysyna qarsy is-qımyl basqarmasynyń qyzmetkerleri shaqyrylyp, tekserý júrgizilgen. 

– Kúdiktiniń biri terezeden laqtyrǵan kıimniń qaltasynan 1 zıp-paketke oralǵan sıntetıkalyq esirtki tabyldy. Kúdiktilerdiń 25 jáne 19 jastaǵy aǵaly-inili ekeni anyqtaldy. Olardyń esirtkini qaıdan alǵany, kimge taratpaq bolǵany tekserilip jatyr, - dep málim etti departamenttiń baspasóz qyzmetinen. 

Qazir kúdiktilerge qatysty qylmystyq is qozǵaldy. Soǵan sáıkes keshendi tergeý amaldary bastaldy.

Eske sala ketelik, budan buryn Atyraý oblysynda 1 jylda 250 keliden astam esirtki tárkilengenin jazǵan bolatynbyz.