Atyraýda ózin órtegen er adam aýrýhanada qaıtys boldy

ATYRAÝ. KAZINFORM — Atyraýda 63 jasqa tolatyn er adam ózin órtep, 81 paıyz kúıikpen aýrýhanaǵa túsken edi. Er adam búgin oblystyq aýrýhananyń jansaqtaý bóliminde kóz jumdy.

Atyraý oblystyq densaýlyq saqtaý basqarmasy baspasóz qyzmetiniń aqparatyna súıensek, oblystyq aýrýhanaǵa ózin-ózi órtegen adam 14 qańtarda keshki saǵat 20:15–te jetkizilgen.

«Dárigerler er adamnyń densaýlyq jaǵdaıyn jiti tekserdi. Naýqas jansaqtaý bólimshesine jatqyzyldy. Onyń jaǵdaıy aýyr boldy. Denesiniń 81 paıyzynan astamyn kúıik shalǵan. Dárigerler oǵan qajetti em-domnyń bárin jasady. Búgin tańǵy saǵat 04:30-da oblystyq aýrýhananyń jansaqtaý bóliminde jatqan er adam esin jımastan qaıtys boldy», -dep habarlady basqarmanyń baspasóz qyzmeti.

Eske sale buǵan deıin Atyraýda ózin-ózi órtegen er adam 81 paıyz kúıikpen aýrýhanaǵa túskenin habarlaǵan bolatynbyz.

Oblystyq polıtsııa departamenti baspasóz qyzmetiniń málimetinshe, oqıǵa Maqat aýdanynda bolǵan.

«Maqat aýdandyq polıtsııa bólimine Dossor kentiniń Aımaǵambetov kóshesindegi turǵyn úıdiń janynda er adamnyń ózin-ózi órtegeni týraly habar tústi. Polıtsııa qyzmetkerleri ózin-ózi órtegen atalǵan aýdannyń 1961 jylǵy turǵyny ekenin anyqtady», — dep habarlaǵan edi departamenttiń baspasóz qyzmeti.