Atyraýda ózge tilde jazylǵan jazýy bar memlekettik týmen fotoǵa túskender ustaldy

ATYRAÝ. KAZINFORM – Atyrýdyń 4 turǵyny ózge tilde jazylǵan jazýy bar memlekettik týdy ustap, fotoǵa túsken. Jergilikti polıtsııa qyzmetkerleri memlekettik rámizderdi qorlaý babymen qylmystyq is qozǵady. 

Atyraý oblystyq polıtsııa departamentiniń baspasóz qyzmetinen málim etkendeı, qazir sotqa deıingi tergeý bastalǵan.

— Áleýmettik jelide taralǵan fotoǵa baılanysty memlekettik rámizderdi qorlaý babymen qylmystyq is qozǵaldy. Sotqa deıingi tergeý amaldary júrgizilip jatyr. Taralǵan jazbadaǵy tórt kúdikti anyqtalyp, polıtsııa bólimshesine jetkizildi. Olardyń ekeýi — kámeletke tolmaǵan jasóspirim. Sol sebepten, ata-analarynyń qatysýymen jasóspirimderden jaýap alynyp jatyr. Ózge aqparat tergeý múddesine sáıkes jarııalaýǵa jatpaıdy, - dep málim etti polıtsııa departamentiniń baspasóz qyzmeti. 

Eske sala ketelik, budan buryn Túrkistan oblysynda ekstremıstik materıaldardy taratqan top ustalǵany habarlanǵan bolatyn.