Atyraýda ózge óńirden kelgen eki boıjetkennen sıntetıkalyq esirtki tárkilendi

ATYRAÝ. KAZINFORM — Atyraýda sıntetıkalyq esirtkini zańsyz saqtap, satýmen aınalysqan eki boıjetken ustaldy. Olar esirtkini shahar aýmaǵynda jasyryn orynǵa jetkizýmen aınalysqan.  

Oblystyq polıtsııa departamenti baspasóz qyzmetiniń aqparatyna qaraǵanda, 22 jáne 25 jastaǵy boıjetkender Atyraýǵa byltyrǵy qarashada kelgen. Onyń biri — astanalyq, ekinshisiniń Pavlodar oblysynda turatyny anyqtalǵan.

«Polıtsııa qyzmetkerleri jedel-izdestirý is-sharasyn júrgizip, qala aýmaǵynda sıntetıkalyq esirtkini jasyryn tyǵý ádisi arqyly satý kúdigine ilingen Astana qalasy men Pavlodar oblysynyń turǵyndaryn ustady. Kúdiktiler turatyn mekenjaıdy tekserý kezinde 1 orama jáne qala aýmaǵyna jasyryn tyǵylǵan 29 orama tárkilendi. Saraptama qorytyndysymen 1 dana oramada quny 5 mln teńgeni quraıtyn 300-ge jýyq doza bolatyn a-PVP sıntetıkalyq esirtki salynǵany anyqtaldy. Kúdikti qyzdar Atyraý qalasyna sıntetıkalyq esirtki satatyn ınternet dúkenge jumysqa ornalasý maqsatyn kózdep kelgeni belgili boldy», -dep habarlady departamenttiń baspasóz qyzmeti.

Qazir kúdiktilerge qatysty «kúzetpen ustaý» túrindegi bultartpaý sharasy qoldanyldy. Sotqa deıingi tergeý amaldary júrgizilip jatyr.

 Eske sala ketelik, buǵan deıin Atyraý oblysynda bir jylda 65 esirtki qylmysy tirkelgenin habarlaǵan bolatynbyz.