Atyraýda ózen jaǵasynda qamys órtendi
ATYRAÝ. KAZINFORM – Atyraý qalasyna qarasty Damba aýylynan shamamen 6 shaqyrym jerde, Jaıyq ózeniniń jaǵasynda qamys órtendi, dep habarlaıdy Tótenshe jaǵdaılar mınıstrligi.
Órt 31 qazanǵa qaraǵan túni shyqqan. Oqıǵa ornyna jetken órt sóndirýshiler jalyn sharpyǵan aýmaqqa arnaıy tehnıkanyń bara almaıtynyn anyqtady.
Órt oshaǵy kólikpen jetýge qıyn jerde ornalasqandyqtan, órt sóndirýshilerdi jetkizý úshin júzý quraldary paıdalanyldy.
– TJM qyzmetkerleri órtti sóndirý jumystaryn uıymdastyryp, jalynnyń odan ári taralýyna jol bermedi, – dep habarlady vedomstvo.
Jedel qabyldanǵan sharalardyń nátıjesinde 1 gektar aýmaqty sharpyǵan órt tolyq sóndirildi.
Oqıǵadan zardap shekkender joq.
Aıta keteıik, buǵan deıin Atyraý oblysynyń Qyzylqoǵa aýdanynda 10 gektar aýmaqty sharpyǵan qamys órti sóndirilgen edi. 18 qazanda bastalǵan órtti aýyzdyqtaýǵa 69 adam men 11 tehnıka jumyldyrylǵan.
