Atyraýda ótken jyly brakonerlerge 31,7 mln teńge aıyppul salyndy

ATYRAÝ. KAZINFORM — Ótken jyly Atyraý oblysynda balyq aýlaý erejelerin buzýǵa qatysty 2200-den astam zańbuzýshylyq tirkeldi. Sonyń ishinde brakonerlikke baılanysty 10 derek boıynsha qylmystyq is qozǵalyp, kinálilerge jalpy somasy 31,7 mln teńgeden astam aıyppul salyndy.

Bul týraly Jaıyq–Kaspıı oblysaralyq basseındik balyq sharýashylyǵy ınspektsııasy habarlady.

Inspektsııanyń málimetinshe, ótken jyly óńirde ıhtıologııalyq monıtorıng júrgizý, balyq aýlaýdy retteý jáne sý aıdyndaryn saqtaý baǵytynda aýqymdy jumystar atqarylǵan. Ásirese, ótken jylǵy kóktemgi tasqynnan keıin erekshe nazar aýdarylypty.

— Atyraý jáne Batys Qazaqstan oblystary aýmaǵyndaǵy oqshaýlanyp qalǵan, qysta qatý qaýpi bar sý aıdyndarynan balyq shabaqtaryn qutqarý boıynsha keshendi sharalar júrgizdik. Nátıjesinde tuqy tárizdes balyqtardyń 43,3 mıllıon shabaǵy qutqaryldy, — dedi ınspektsııanyń baspasóz hatshysy Rústembek Qorqytov.

Inspektsııa ókilderi balyq aýlaý erejelerin saqtaý tek ákimshilik jaýapkershilikten qutylýdyń joly emes, óńirdiń ekojúıesin saqtaýǵa qosylatyn mańyzdy úles ekenin atap ótti.

Qazirgi ýaqytta baqylaý sharalary jalǵasyp jatyr. Al balyq resýrstaryn zańsyz paıdalanýdy júıeli túrde jalǵastyratyn azamattarǵa qatysty jaýapkershilik sharalary qatańdatylmaq.

Osyǵan deıin Aqmola oblysynda 640 keli balyq aýlaǵan brakonerler sottalǵany jóninde jazǵan edik.