Atyraýda ótken respýblıkalyq aıtystyń bas júldesi áskerı qyzmetshige buıyrdy
ASTANA. KAZINFORM — Qorǵanys mınıstrliginiń áskerı qyzmetshisi respýblıkalyq aqyndar aıtysynda bas júldege ıe boldy.
Atyraý qalasynda qazaqtyń kórnekti jyraýy Kárim Qısamedenulynyń týǵanyna 100 jyl tolýyna arnalǵan respýblıkalyq aqyndar aıtysy ótti. Ulttyq ónerdi ulyqtaǵan aıtýly dodaǵa elimizdiń ár óńirinen kelgen aqyndar qatysyp, sýyrypsalma sheberlikterin kórsetti.
Aıtys qorytyndysy boıynsha Arnaıy operatsııalar kúshteriniń áskerı qyzmetshisi kishi serjant Farıza Jetpisbaı bas júldeni jeńip aldy.
Farıza Jetpisbaı jyr dodasynda Kárim jyraýdyń eldik murasyn búgingi zamanmen sabaqtastyryp, Otan qorǵaý, áskerı qyzmettiń abyroıy, el qaýipsizdigi jáne patrıotızm taqyryptaryn áserli jyrlady. Onyń shyǵarmashylyǵynda áskerı borysh pen ulttyq rýh úndesip, kórermenniń ystyq yqylasyna bólendi.
Qazylar alqasy áskerı qyzmetshiniń aıtystaǵy sheberligin, oı tereńdigin jáne eldik máselelerdi jyr arqyly jetkizý qabiletin joǵary baǵalady.
Aıtys nátıjesinde І oryndy Nurasyl Isa, ІІ oryndy Batyrjan Kádirbaı, ІІІ oryndy Ernur Isahaev ıelendi.
Mereıtoılyq shara aıasynda aqyndar Kárim jyraýdyń shyǵarmashylyq murasyn nasıhattap, ulttyq qundylyqtar, el birligi, týǵan jerge degen súıispenshilik jáne urpaq sabaqtastyǵy taqyryptaryn keńinen tolǵady.
Kárim jyraýdyń 100 jyldyǵyna arnalǵan jyr dodasy qazaqtyń aıtys ónerin dáriptep, ulttyq rýhty nyǵaıtýǵa baǵyttalǵan mańyzdy mádenı shara retinde este qaldy.
Buǵan deıin Qostanaıda aıtysker aqyn Saltanat Ótelbaeva men joldasy jol apatynan kóz jumǵanyn jazdyq.
